Madridning "Atletiko" klubi La liganing ushbu mavsumida o‘tkazgan 14ta uchrashuvning yarmida durang qayd etdi. Diyego Simeone shogirdlari mavsum kashfiyoti bo‘lib turgan "Granada"ga qarshi o‘yinda 2 ochko yo‘qotishdi.

Bahs davomida kichik ustunlik madridliklar tomonida bo‘ldi. 60-daqiqada Erreraning uzatmasidan keyin "Matraschilar"ning chap qanot himoyachisi darvozabon bilan yakkama-yakka vaziyatga chiqdi va o‘tkir burchak ostida to‘pni posbonning oyoqlari orasidan o‘tkazib, hisobni ochdi.

Oradan atiga 7 daqiqa o‘tib mezbonlar burchak zarbasidan so‘ng hisobni tenglashtirishdi. Xerman Sanchesning bosh bilan zarba berishiga "Atletiko" futbolchilari xalal berishmadi.

So‘nggi daqiqalarda madridliklar g‘alabani ilib ketishlari mumkin edi, ammo ular imkoniyatlardan foydalana olishmadi.

Ushbu durangdan so‘ng "Atletiko"ning ochkolari 25taga, "Granada"niki esa 21taga yetdi.

Ispaniya La ligasi, 14-tur
Granada – Atletiko 1:1 (0:0, 1:1)
Gollar: 0:1 – 60 Lodi, 1:1 – 67 Xerman Sanches.
Granada – Ruy Silva, Kini, Dias, Xerman Sanches (Martines, 71), Duarte, Gonalon, Vadilyo (Machis, 65), Puertas, Aziz (Fernandes, 62), Montoro, Soldado.
Atletiko – Oblak, Lodi, Trippyer, Ermoso, Felipe, Vitolo (Poveda, 83), Lyorente (Joau Feliks, 75), Koke, Errera, Korrea (Lemar, 55), Morata.
Ogohlantirishlar: Korrea (28), Soldado (31), Felipe (39), Montoro (43), Puertas (54), Gonalon (63), Lyorente (66).