Rossiyaning Moskva shahrida taekvondo WT bo‘yicha yilning yakuniy Gran-pri musobaqasi o‘z yakuniga yetib bormoqda. Biroz avval hamyurtimiz Nikita Rafalovich bronza medali uchun kechgan bahsda misrlik Seif Issaga qarshi dayanga chiqdi.
Hamyurtimiz mazkur bellashuvda o‘z ustunligini namoyish eta oldi va qo‘shimcha vaqtda 7:5 hisobida g‘alaba qozonib, musobaqaning bronza medaliga sazovor bo‘ldi. Mazkur natija Rafalovich uchun Tokio Olimpiadasi reytingiga 28,8 ochko taqdim qilibgina qolmasdan Olimpiadaga yo‘llanma beruvchi o‘rnini egallab qolishiga zamin yaratadi.
Moskva Gran-prisi Tokio Olimpiadasiga reyting ochkolarini beradigan yakuniy turnir hisoblanadi. Ushbu musobaqadan so‘ng Butunjahon taekvondo WT federasiyasi sportchilarning reyting ochkolarini hisob-kitob qiladi va yaqin vaqt ichida yakuniy holatni rasman e’lon qiladi. Ushbu natija bugungacha reytingning to‘rtinchi o‘rinini egallab turgan Rafalovichga mazkur pog‘onani saqlab qolish imkoniyatini taqdim qiladi. Reglamentga ko‘ra, Olimpiada reytinging yakunida kuchli beshlikdan joy olgan taekvondochilar Tokio Olimpiadasi yo‘llanmasini naqd qiladi.
Ma’lumot uchun, Nikita Rafalovich faoliyatida ikkinchi bor yakuniy Gran-prida bronza medaliga sazovor bo‘lmoqda. Hamyurtimiz bundan 2 yil avval Kot d’Ivuarning Abijan shahrida o‘tgan musobaqada ham shohsupaga ko‘tarilgan edi.
