BAA poytaxti Abu Dabida yangi mavsumning ilk o‘quv-mashg‘ulot yig‘inini o‘tkazayotgan “Lokomotiv” bugun ikki mahal shug‘ullandi. O‘tgan kuni futbolchilar faqat ertalab trenajyor zalda shug‘ullanib, tushdan so‘ng murabbiylar shtabi jamoaga dam bergandi.

Kechadan yana ikki mahal mashg‘ulotlar boshlandi. Ikkala mashg‘ulot ham futbol maydonida kechdi. Jamoa a’zolari har bir mashg‘ulotga o‘ta mas’uliyat bilan yondoshgan holda qattiq mehnat qilishyapti. Aytish mumkinki, jamoa yangi mavsumga puxta hozirlik ko‘rmoqda.

Kechagi mashg‘ulotga ikki nafar futbolchi qo‘shildi. O‘tgan mavsumni “So‘g‘diyona” va “Buxoro”da o‘tkazgan yarim himoyachi Davron Umirov bilan “Lokomotiv” futbol maktabi tarbiyalanuvchisi Javohir Abdualimov. Aytish mumkinki, Umirov “Loko” bilan shartnoma imzoladi hamda ushbu mavsumni “temiryo‘lchilar” safida o‘tkazadi.

Kunduzgi mashg‘ulotda asosiy e’tibor jismoniy holat bilan birgalikda to‘pni to‘g‘ri nazorat qilish hamda aniq zarba berishga qaratildi, kechki mashg‘ulotda esa asosan standart vaziyatlar ustida ishlandi. Eslatib o‘tamiz, Abu Dabi yig‘ini 15-yanvarga qadar davom etadi, shundan so‘ng “temiryo‘lchilar” Toshkentga qaytib OCHL pley-off bosqichi doirasida Tojikistonning “Istiqlol” klubi bilan kechadigan bahsga tayyorgarlikni davom ettirishadi.

Abu Dabidagi yig‘in chog‘ida “Loko” ikkita o‘rtoqlik uchrashuvida maydonga tushadi. Dastlabkisi 11-yanvar kuni Shotlandiyaning “Glazgo Reynjers” klubiga qarshi kechsa, ikkinchi nazorat bahsi 14-yanvarda Xitoyning “Jiangsu Suning” jamoasi bilan bo‘ladi.