БАА пойтахти Абу Дабида янги мавсумнинг илк ўқув-машғулот йиғинини ўтказаётган “Локомотив” бугун икки маҳал шуғулланди. Ўтган куни футболчилар фақат эрталаб тренажёр залда шуғулланиб, тушдан сўнг мураббийлар штаби жамоага дам берганди.

Кечадан яна икки маҳал машғулотлар бошланди. Иккала машғулот ҳам футбол майдонида кечди. Жамоа аъзолари ҳар бир машғулотга ўта масъулият билан ёндошган ҳолда қаттиқ меҳнат қилишяпти. Айтиш мумкинки, жамоа янги мавсумга пухта ҳозирлик кўрмоқда.

Кечаги машғулотга икки нафар футболчи қўшилди. Ўтган мавсумни “Сўғдиёна” ва “Бухоро”да ўтказган ярим ҳимоячи Даврон Умиров билан “Локомотив” футбол мактаби тарбияланувчиси Жавоҳир Абдуалимов. Айтиш мумкинки, Умиров “Локо” билан шартнома имзолади ҳамда ушбу мавсумни “темирйўлчилар” сафида ўтказади.

Кундузги машғулотда асосий эътибор жисмоний ҳолат билан биргаликда тўпни тўғри назорат қилиш ҳамда аниқ зарба беришга қаратилди, кечки машғулотда эса асосан стандарт вазиятлар устида ишланди. Эслатиб ўтамиз, Абу Даби йиғини 15-январга қадар давом этади, шундан сўнг “темирйўлчилар” Тошкентга қайтиб ОЧЛ плей-офф босқичи доирасида Тожикистоннинг “Истиқлол” клуби билан кечадиган баҳсга тайёргарликни давом эттиришади.

Абу Дабидаги йиғин чоғида “Локо” иккита ўртоқлик учрашувида майдонга тушади. Дастлабкиси 11-январь куни Шотландиянинг “Глазго Рейнжерс” клубига қарши кечса, иккинчи назорат баҳси 14-январда Хитойнинг “Жиангсу Сунинг” жамоаси билан бўлади.