Stadion.uz ortda qolayotgan haftada Yevropa futbolida barchaning e’tiborini o‘ziga tortgan voqealarga qisqacha to‘xtalib o‘tadi.
“Arsenal”yana yutqazmadi
Londoning “Arsenal”jamoasi Mikel Arteta qo‘l ostida 2020 yil davomida 9 ta o‘yinda maydonga tushgan bo‘lsa, hali mag‘lubiyat alamini tortganicha yo‘q. “To‘pchilar”“Olimpiakos”ustidan mehmonda minimal hisobda g‘alaba qozonishganidan xabaringiz bor. Ha aytgancha, Yevropa jamoalari ichida “Bavariya”va “Verona”klublari ham yangi yildan beri mag‘lub bo‘lishgani yo‘q.
Cherishevdan rekord
Rossiyalik futbolchi YECHL doirasida “Atalanta”klubiga qarshi uchrashuvda bejiz maydonga tushmadi. Avvalo uning javob uchrashuvi oldidan “Valensiya”ga kichik umid taqdim etganini alohida qayd etib o‘tish joiz. Shuningdek, qahramonimiz maydonga tushgach, 2 daqiqada gol kiritdi va bu boradagi Soldadoning rekordini tortib oldi. Unga qadar ispaniyalik hujumchi zaxiradan o‘yinga qo‘shilganidan 4 daqiqa o‘tibgina gol kiritishni uddalagan edi.
Darvozabonlar Londondagi o‘yinlarni qutqarishdi
Madridda bo‘lgan uchrashuvda atigi bir bor seyv ijro etildi. Morataning zarbasini Alisson qaytardi va bo‘ldi. Boshqa vaziyat ko‘zga tashlanmadi. Dortmund va Parij to‘qnashuvida ham aytarli seyvlarga ko‘zimiz tushmadi. Londondagi o‘yin esa bulardan umuman o‘zgacha ko‘rinish oldi. Gulachi ham, Lyoris ham o‘sha kuni o‘zlarini ko‘rsatishni uddalashadi. YECHLda haftaning eng yaxshi darvozaboni sifatida e’tirof etilgan Ugoga alohida to‘xtalib o‘tishga qaror qildik. Mourinyo Son va Keynsiz qolganiga qaramay, tarkibda Lyoris bor. U javob uchrashuvida bir o‘zi “mo‘’jiza”ko‘rsatishga qodir ekanligini Londonda isbotlab qo‘ydi.
Jerrarddan yana “firmenniy”kambek
Stiven Jerrard boshchiligidagi “Glazgo”Evropa ligasi doirasida 66-daqiqaga qadar 0:2 hisobida yengilayotgan edi. Faoliyati davomida hech qachon erta yengilmagan futbolchi “Braga”ga qarshi ham mag‘lub bo‘lishni istmadi. U amalga oshirgan o‘zgarishlar darrov maydonda effekt berishni boshladi. Avvaliga afsonaviy Georgi Xajining o‘g‘li Yanis hisobni tenglashirgan bo‘lsa, Aribo vaziyatni shotlandlar tomoniga og‘dirdi. To‘g‘ri, “Glazgo Reynjers”g‘alaba qozondi, biroq ularni Portugaliyadagi javob uchrashuvi kutib turibdi.
“Liverpul”Madridda “qoqildi”
Madridda to‘qnash kelgan “muz”va “olov”o‘rtasidagi bahs kutilmaganda “sovuq”o‘yin uslubidan foydalangan “Atletiko”foydasiga hal bo‘ldi. To‘g‘ri, “Liverpul”ning mag‘lub bo‘lishi haftaning eng ko‘zga ko‘ringan voqeasi bo‘lgani yo‘q, shunchaki Klopp shogirdlari o‘yin davomida birorta aniq zarba berishni uddalay olmagani hayron qoldirdi. O‘sha oqshom Klopp tanlagan strategiya ish bermadi. Simeone esa durangga umid qilgan edi. Saul uning umidlarini g‘alabaga aylantirib berdi. Eng qizig‘i shundaki, javob uchrashuvi umuman boshqa ko‘rinish oladi. Biz tezkor qaror qabul qiluvchi agressiv “Liverpul”va ehtiyotkor va qarshi hujumga suyangan xavfli “Atletiko”to‘qnashuvidan ( birinchi o‘yindan farqli o‘laroq) zavq olishimiz aniq!
Kamtarin “Xetafe”
O‘tgan mavsum kashfiyotlari sanalgan “Ayaks”uchun “Xetafe”ortiqcha qiyinchilik tug‘dirmasligi tahmin qilgan edi. Atigi bir mavsum ilgari “Real Madrid”, “Yuventus”singari jamoalarni mehmonda ham qiyin ahvolda qoldirgan gollandlar ortiqcha qiyinchiliksiz “xokisor”“Xetafe”ni yengishlari kerak edi. Ispaniyadagi uchrashuv esa, barchada ikkita fikr uyg‘otdi. “Xetafe”juda ayyor va “Ayaks”ancha zaiflashibdi. Menimcha, birinchi fikr biroz haqiqatga yaqinroq. La Ligada ko‘rimsizgina tarkib bilan ham kuchli to‘rtlikda ketayotgan klub to‘g‘ri tanlangan taktika evaziga “Ayaks”ga o‘yin bermadi. Gollandlaro‘yin davomida atigi bir aniq zarba berishdi, xolos. 2:0 va “Xetafe”javob bahsi oldidan kichik sensasiya ko‘rsatib bo‘ldi. Katta ehtimol bilan bu jamoa “Ayaks”ga kambek qilishga bermasa kerak. Yana kim biladi deysiz?
Erling Mbappega dars berdi
Dyugarrining fikrlari keskin, biroq haqiqat. Darhaqiqat, agar Mbappe “Oltin to‘p”ni olishni istasa, Xoland singari barchani shokka tushurib qo‘yishi kerak. Bu ikki bo‘lajak yulduzlar to‘qnashuvida norvegiyalik bolakay nafaqat Mbappega, balki butun PSJga kichik dars o‘tib berdi. Xoland kiritgan ikkita golni bir eslang! Qahramonimiz barchasini xuddi 15 yillik tajribasi bor hujumchilardek bajaribgina qolmay, uchrashuv davomida to‘liq himoyaga ham qaytishga ulgurdi. Shunday bo‘lsada, Parijda oson bo‘lmasligi aniq. Neymarning goli vaziyatni biroz chigallashtirdi. Buning ham o‘ziga xos tomonlari mavjud. Agar, Xoland Parijda ham o‘zini ko‘rsata olsa, ana keyin uni superyulduzlar qatorishiga qo‘shishimiz mumkin bo‘ladi.
“Atalanta” butun Yevropani hayratda qoldirdi
Barchaning ham hafta davomida 10 uchrashuvni to‘liq tomosha qilish uchun vaqti yo‘q. Shu sababli, kimlargadir “Xetafe” yoki “Atalanta”ning qanchalar yaxshi o‘yin ko‘rsatayotganidan bexabar qolayotgan bo‘lishi mumkin. Hayron bo‘lmang, “Atalanta” ayni damda butun Yevropadagi eng kuchli hujum uyushtiradigan jamoalardan biriga aylanib olganiga ancha bo‘ldi.
Bergamoliklarning stadionlari YECHL talablariga javob bermagani uchun “San-Siro” yordamga keldi. Muxlisalar ushbu arenada shunday shovqin ko‘tarishdiki, hatto “Milan” tifozilarining ham havasi kelib ketdi. O‘yin ham shunga yarasha bo‘lganini alohida qayd etib o‘tish joiz. Xatebur va De Ron ispanlarni ancha qiyin ahvolga solib qo‘yganiga guvoh bo‘ldingiz. Boz ustiga, klub o‘z tarixida ilk bor YECHLning pley-off o‘yinida ishtirok etdi va uni o‘z foydasiga hal etdi. “San-Siro”da o‘ynagan bergamoliklar ushbu haftaning chinakam qahramonlari desak, adashmagan bo‘lamiz.
