Hatto Braziliya futboli ham inqirozga uchrab turadi. Ayniqsa, Peledek qirol uzoq yillar termada o‘ynagach, oxirgi ishtirokida uchinchi marta mundial g‘olibi bo‘lgach, uning yo‘qligi sezilishi kerak edi. Sezilgan.

24 yil futbol afsungarlari chempion bo‘la olishmagan. 1994 yilgi AQSH mundiali va unda Romarioning cheksiz quvonchi Braziliya ahlini titratib yuborgan.

Shu oraliqda Braziliya futboli jahon chempionatlarida o‘rtamiyona darajaga tushib ketishi ham mumkin edi. Birgina yulduzning hisobiga bu yurt futboli o‘z darajasini ushlab turgan. Ziko.

Mexiko-86 eng yaxshi chempionat deb e’tirof etiladi, bilasiz. Sababi,  yulduzlarning ko‘pligida. Futbol osmoni yulduzlarning ko‘pligidan kunduzdagidek yorishib ketgan. Ana shu yorqin yulduzlardan biri Ziko edi. Peledan keyin nihoyat katta jamoa sifatida qaralgan Braziliyaning tashrif qog‘ozchasi shu yigit edi.

Zikoni juda omadsiz yulduz deyishadi. Aslida undoq emas. Zikoning vazifasi markazdagi ishi kabi Braziliyaning inqirozli davrini maromda ushlab turish, Peledan Romariogacha bo‘lgan davrni bog‘lab berish edi. Ko‘prik vazifasini bajarib bergan, desak bo‘laveradi.

Odamlar suvning bu tomonidan u tomoniga ko‘prikda o‘tishadi-da, odatda ko‘prikka qarabam qo‘yishmaydi. O‘tib kelgan narigi tomonlariga sog‘inch bilan tikilib qo‘yishadi. Yangi manzillarini o‘rganadilar. Ko‘prik kamtar. Ishini bajarib, yana odamlarning xizmatida.

Ziko ana shunday og‘ir davrlarning ko‘prigi edi. U Braziliya futbolini Qiroldan so‘ng ko‘tarib turishga, nurli davrlariga og‘riqsiz olib o‘tishga muvaffaq bo‘lgan durdona asar edi.

Braziliya futboli unga xuddi Pele va Romario, Ronaldo, Ronaldinyo kabi daholarga bo‘lgan ehtiromini ko‘rsatitishiga ham sabab shu.

Bugun (3 mart) Ziko 67 yoshni qarshi olibdi. “Bunyodkor”ning sobiq murabbiyi murabbiylikda chindan ham omadsiz. Peledan keyingilar o‘zi shunaqa.

Xayrulla Hamidov