Klasikodan keyin ham hayot bor. Lekin chempionlik “Real” va “Barselona” o‘rtasida hal bo‘ladigan ko‘rinadi. Doim Ispaniya grandlariga bosh og‘riq bo‘ladigan “Atletiko” hozirda YECHLda o‘ynash huquqini beradigan o‘ringa e’tibor qaratadi. Buning ustiga Simeone shogirdlarini bugungi bahsdan so‘ng keyingi hafta o‘rtasida “Enfild”da qirpichoq o‘yin kutib turibdi. Shu boisdan ham “matraschilar”ning o‘yini neytral odamlar uchun ham qiziq bo‘lib qoldi.

“Vanda Metrapolitano”da madridlik yigitlar qishda faqat “Barselona”ga imkoniyatni boy berishdi. Bugun unga mehmon bo‘lib kelayotgan “Sevilya”ga oson kechmasligi aniq (2008 yildan buyon bu stadionda “Sevilya” yengmagan). Lekin andalusiyaliklarning barqarorsiz o‘yini bu bahsda ulardan nedir kutilmagan hodisa kutishga asoslar ulashadi. Ishonmasangiz, bu yilgi “Sevilya” o‘yinlarini ko‘rib chiqing, sensasion natijalar bosib yotibdi. Bu yilgi kashfiyot – “Xetafe”ni borib yirik hisobda yutib keladimiYE, keyinidan uyida “Osasuna”ga bir o‘yinchi ko‘p bo‘lib yutuqli o‘yinni berib yuborishiga bir bahya qoladimiYE... Xullas, “Sevilya” bor joyda intriga bor, gollar bor va muhimi, go‘zal futbol bor. Xuan Lopetegi bu mavsum ko‘pgina raqiblariga sifatli futbol taklif etmoqda.

Simeoneni bilasiz. U o‘sha-o‘sha. Hozirda asosan “Liverpul”ga taraddud ko‘rayotgan bo‘lsa-da, jadvalda o‘zidan ikki ochko ortda borayotgan “Sevilya”ni esdan chiqarishga haqqi yo‘q.

Soat 20:00 – ideal vaqtda Futbol TV kanalida ushbu quvnoq o‘tishi kutilayotgan o‘yinni kuzating. “Liverpul” va “Roma” muxlislari ayniqsa. Axir, shu o‘yindan so‘ng sizlarning suyuklilaringiz huzuriga ravona bo‘ladi “Atletiko” va “Sevilya”.

Xayrulla HAMIDOV.