Класикодан кейин ҳам ҳаёт бор. Лекин чемпионлик “Реал” ва “Барселона” ўртасида ҳал бўладиган кўринади. Доим Испания грандларига бош оғриқ бўладиган “Атлетико” ҳозирда ЕЧЛда ўйнаш ҳуқуқини берадиган ўринга эътибор қаратади. Бунинг устига Симеоне шогирдларини бугунги баҳсдан сўнг кейинги ҳафта ўртасида “Энфилд”да қирпичоқ ўйин кутиб турибди. Шу боисдан ҳам “матрасчилар”нинг ўйини нейтрал одамлар учун ҳам қизиқ бўлиб қолди.

“Ванда Метраполитано”да мадридлик йигитлар қишда фақат “Барселона”га имкониятни бой беришди. Бугун унга меҳмон бўлиб келаётган “Севилья”га осон кечмаслиги аниқ (2008 йилдан буён бу стадионда “Севилья” енгмаган). Лекин андалусияликларнинг барқарорсиз ўйини бу баҳсда улардан недир кутилмаган ҳодиса кутишга асослар улашади. Ишонмасангиз, бу йилги “Севилья” ўйинларини кўриб чиқинг, сенсацион натижалар босиб ётибди. Бу йилги кашфиёт – “Хетафе”ни бориб йирик ҳисобда ютиб келадимие, кейинидан уйида “Осасуна”га бир ўйинчи кўп бўлиб ютуқли ўйинни бериб юборишига бир баҳя қоладимие... Хуллас, “Севилья” бор жойда интрига бор, голлар бор ва муҳими, гўзал футбол бор. Хуан Лопетеги бу мавсум кўпгина рақибларига сифатли футбол таклиф этмоқда.

Симеонени биласиз. У ўша-ўша. Ҳозирда асосан “Ливерпуль”га тараддуд кўраётган бўлса-да, жадвалда ўзидан икки очко ортда бораётган “Севилья”ни эсдан чиқаришга ҳаққи йўқ.

Соат 20:00 – идеал вақтда Футбол ТВ каналида ушбу қувноқ ўтиши кутилаётган ўйинни кузатинг. “Ливерпуль” ва “Рома” мухлислари айниқса. Ахир, шу ўйиндан сўнг сизларнинг суюклиларингиз ҳузурига равона бўлади “Атлетико” ва “Севилья”.

Хайрулла ҲАМИДОВ.