Bugun bayram. Futbol bayrami. Zo‘r o‘yinlar kutyapti bizni. Futbol kuni.

Dastavval Manchester derbisi bor. Ajoyib o‘yin. Hamkasbim Davron Fayziyev ishlaydi (Men "fan-taymchilar"ga yordam beraman).

Tunroqqa o‘tsak, Turindagi "Yuventus" - "Inter" bahsi mohiyatan muhimroq. Soat 00:45dagi o‘yin "Real" ishtirokidagi bahsga parallel tushib qolgan, xo‘sh, nima bo‘pti, unisiniyam, bunisiniyam muxlisi bor. Ko‘rilmay qolmaydi ikkisi.

Sarri kreslosi g‘ichirlayotganini hisobga olsak, turinlik yulduzlar yangi ustozlarini nima qilisharkan, ko‘ramiz. Vaholanki "eski senyora" anchadan beri futbol o‘ynamayapti, sababi ma’lum. "Inter" ham bo‘sh stadionda "Ludogores"ni yengib, Yevropa ligasi nimchorak finaliga chiqdi. Kayfiyat "neradzurra"da yaxshiroq. Chunki Yuve bo‘m-bo‘sh stadionda o‘ynashga qiynalishini "San Siro"dagi kubok o‘yinida ko‘rdik.

Bugun ham o‘yin muxlislarsiz o‘tadi. Dunyoni zabt etayotgan virus tufayli A seriya o‘yinlari shunday o‘tadi. Qachongacha, bilmaymiz.

Turinliklarga qiyindir bunaqa holatdagi o‘yinda qatnashish, menga unchalik mushkulmas. Yaqinginada jonajon superligamiz o‘yinlarini sharhlab, muxlislarsiz o‘yinga immunitet hosil qilgan kaminaga qaytanga osonroq.

Demak, 00:45da siz azizlarni Italiya superligasining superuchrashuviga taklif etamiz!)

Xayrulla Hamidov.