Бугун байрам. Футбол байрами. Зўр ўйинлар кутяпти бизни. Футбол куни.

Даставвал Манчестер дербиси бор. Ажойиб ўйин. Ҳамкасбим Даврон Файзиев ишлайди (Мен "фан-таймчилар"га ёрдам бераман).

Тунроққа ўтсак, Туриндаги "Ювентус" - "Интер" баҳси моҳиятан муҳимроқ. Соат 00:45даги ўйин "Реал" иштирокидаги баҳсга параллел тушиб қолган, хўш, нима бўпти, унисиниям, бунисиниям мухлиси бор. Кўрилмай қолмайди иккиси.

Сарри креслоси ғичирлаётганини ҳисобга олсак, туринлик юлдузлар янги устозларини нима қилишаркан, кўрамиз. Ваҳоланки "эски сеньора" анчадан бери футбол ўйнамаяпти, сабаби маълум. "Интер" ҳам бўш стадионда "Лудогорец"ни енгиб, Европа лигаси нимчорак финалига чиқди. Кайфият "нерадзурра"да яхшироқ. Чунки Юве бўм-бўш стадионда ўйнашга қийналишини "Сан Сиро"даги кубок ўйинида кўрдик.

Бугун ҳам ўйин мухлисларсиз ўтади. Дунёни забт этаётган вирус туфайли А серия ўйинлари шундай ўтади. Қачонгача, билмаймиз.

Туринликларга қийиндир бунақа ҳолатдаги ўйинда қатнашиш, менга унчалик мушкулмас. Яқингинада жонажон суперлигамиз ўйинларини шарҳлаб, мухлисларсиз ўйинга иммунитет ҳосил қилган каминага қайтанга осонроқ.

Демак, 00:45да сиз азизларни Италия суперлигасининг суперучрашувига таклиф этамиз!)

Хайрулла Ҳамидов.