Yevropa chempionlar ligasi nimchorak final bosqichi doirasida «Liverpul» o‘z uyida Madridning «Atletiko»sini qabul qildi. Bu jang kutilmagan vaziyatlar va o‘zgarishlarga boy bo‘ldi.

Kutilganidek, mersisaydliklar o‘yinni faol boshlab, mehmonlar darvozasi tomon bosim uyushtira boshlashdi. Birinchi bo‘limda Yan Oblak o‘z jamoasini bir nechta vaziyatlarda qutqardi. Taym tugashiga 3 daqiqa qolganida esa mezbonlar hisobni ochishdi. Aleks-Oksleyd Chemberlen o‘ng qanotdan havolatib yetkazgan uzatmani Veynaldum bosh bilan "Atletiko" darvozasiga joylab qo‘ydi.

Ikkinchi bo‘limda esa "Liverpul"ning xavfli hujumlari soni oshib bordi. Madridliklar posboni esa jamoasini qutqarishda davom etgan bo‘lsa, 66-daqiqada Robertsonning yaqin masofadan bosh bilan yo‘llagan zarbasidan so‘ng to‘p to‘singa tegib qaytdi.

O‘yin so‘ngida Oblak yana bir marta seyv namoyish qilgan bo‘lsa, Sadio Mane tomonidan chalqancha uslubda yo‘llagan zarbaga biroz aniqlik yetishmadi.

Ikki o‘yin natijasiga ko‘p hisob tenglashgani uchun qo‘shimcha bo‘limlar belgilandi. Uning avvalida angliyaliklar ikkinchi golni urishdi. Veynaldum o‘ng qanotdan yetkazgan uzatmaga Firmino bosh bilan zarba berdi, to‘p ustunga tegib, braziliyalik futbolchining o‘ziga qaytdi. Roberto ikkinchi urinishda bo‘sh darvozani ishg‘ol qildi.

Go‘yoki, ushbu goldan keyin "Liverpul" chorak final masalasini hal qilgandek edi. Ammo, lekin, biroq... butun mavsum davomida yetarli o‘yin amaliyotiga ega bo‘lmagan, Alisson jarohat olgani sababli bugun asosiy tarkibda maydonga tushgan "qizillar" posboni Adrian "qovun" tushirdi. Himoyachidan yetkazilgan uzatmani tepib yuborishda darvozabon xatoga yo‘l qo‘ydi. To‘pni egallagan Joau Feliks Lyorentega uzatmadi. Markos esa 23 metrlardan darvozani ishg‘ol qildi.

Birinchi ekstra-taymga qo‘shib berilgan daqiqalarda esa "Atletiko" qarshi hujumdan o‘ta unumli foydalandi. Markos Lyorente bu safar ham jarima maydoni tashqarisidan darvozaning yana o‘sha burchagiga to‘pni joylab qo‘ydi — 2:2.

Endi so‘nggi 15 daqiqalik bo‘limda "Liverpul"dan 2ta gol talab etilar edi. Diyego Simeone esa bunday ustunlikni qo‘ldan boy berib qo‘yadigan murabbiy emas. Uning shogirdlari hisobni saqlab qolish uchun barcha ishni amalga oshirishdi. Ular buni nafaqat uddalashdi, balki 121-daqiqada qarshi hujumda uchinchi golni ham urishdi. Yakkama-yakka vaziyatda Adrian Alvaro Morataning zarbasini qaytara olmadi.

Shu tariqa, Chempionlar ligasining amaldagi g‘olibi alamli tarzda musobaqani tark etdi. "Atletiko" esa chorak final ishtirokchisiga aylandi.

Yevropa chempionlar ligasi, nimchorak final, javob o‘yini
"LIVERPUL" - "ATLETIKO" - 2:3 (1:0, 0:0, 1:2)
Gollar: 1:0 – 43 Veynaldum, 2:0 – 94 Firmino, 2:1 – 97 Lyorente, 2:2 – 105 Lyorente, 2:3 – 120+1 Morata.
Liverpul – Adrian, van Deyk, Robertson, Gomes, Aleksander-Arnold, Veynaldum (Origi, 105), Xenderson (Fabinyo, 105), Oksleyd-CHemberlen (Milner, 82), Mane, Firmino (Minamino, 113), Saloh.
Atletiko – Oblak, Felipe, Trippyer (Vrsalko, 90), Savich, Lodi, Saul, Tomas, Korrea (Ximenes, 105), Koke, Joau Feliks (Morata, 103), Diyego Kosta (Lyorente, 56).
Ogohlantirishlar: Morata (119), Aleksander-Arnold (119), Saul (120).
Dastlabki o‘yin – 0:1.