Bugun 24 mart. Futbolchilar, murabbiylar, klublarga qarab chiqdim, ichida pichoqqa ilinadigani topilmadi. Shuning uchun o‘yinlarni axtardim va topdim. 2012 yilgi 24 martdan.

“Milan” – “Roma” o‘yini. Milanliklarning 2:1 hisobidagi ajoyib g‘alabasi.

Bu o‘yinni hozir eslash ham boshqacha his ulashadi. Italiya A seriyasining shonli davrlari tugayotgan, “Milan” oxirgi marta chempionligini himoya qilayotgan va “Yuventus”ning qo‘rqinchli davri boshlanayotgan onlar. Va tabiiyki, Italiya futboliga dalda bo‘lish uchun ham shu o‘yinni tanladim.

“San Siro”da kechgan bahs “Milan” uchun muhimroq edi. Klub yana chempionlik uchun kurashayotgandi. Tarkibi ham yulduzli edi. Darvozada Abyati, Himoyada Dzambrota va Tyago Silva, yarim himoyada Ambrozini, Boateng Kevin Prins, Stefan Ash-SHaraviy va Alberto Akvilani, hujumda Zlatan Ibrahimovich. Ha, buyog‘i dejavyu – o‘sha Zlatan yangi o‘n yillikda ham haliyam “tirik” va hozir ham shu libosda. Milanliklar zaxirasida Alessandro Nesta va Klarens Zeedorf o‘tirganidan ham jamoa mavqei qandaydiligini bilib olamiz.

Raqib bo‘lmish “Roma”ning ayrim o‘yinchilariga ham nazar: Stekelenburg – posbon, Gabriel Xaynse, Simon Kyer, Daniele de Rossi, Erik Lamela, Franchesko Totti, Miralem Pyanich, Boyan Krkich.

Endi murabbiylarga qarang: “Milan”da Massemiliano Allegri, “Roma”da Luis Enrike. Ajoyib retro.

O‘yinning o‘ziga kelsak, hisobni mehmonlar vakili Osvaldo ochgan, tanaffusga “Roma” g‘olib holda chiqib ketgandi.

Tanaffusdan so‘ng, Zlatan 53 va 83-daqiqalarda o‘z hisobiga gol yozib, jamoasining g‘alabasini ta’minlagan. Yana dejavyu, hozir ham “Milan”da xaloskor o‘sha qariya...

Ba’zi narsalar shiddat bilan o‘zgarsa-da, vaqt hukmiga bo‘ysunmaydigan kuchlar borligiga eng yaxshi hujjat..

Xayrulla Hamidov