Shu kunlarda koronavirus vahimasi hech bir davlatni chetlab o‘tmayapti.

Yurtimizda 16-martdan karantin e’lon qilingani hamda barcha sport tadbirlari to‘xtatilganidan xabaringiz bor. Bularning barchasi dunyo jamoatchiligi diqqat-markazida bo‘lib turgan koronavirusga qarshi samarali kurashish yo‘lida qilinmoqda.

Jizzaxning “So‘g‘diyona” futbolchilari, murabbiylar shtabi va jamoa raxbariyati shunday sinovli kunlarda xalqimiz dardiga malham bo‘lish maqsadida xayrli ishga qo‘l o‘rishdi va o‘z maoshlarining ma’lum qismini karantinda qolayotgan aholi hamda mexribonlik uyidagi bolalar sog‘lig‘i uchun ajratishga qaror qilishdi.

Jamoamiz a’zolaridan yig‘ilgan pullarga qo‘shimcha tibbiy niqoblar, tibbiy qo‘lqoplar va boshqa kerakli narsalar xarid qilindi. “So‘g‘diyona” PFK O‘zbekiston aholisini shu kunlarda qiynayotgan global muammoga befarq qarab turmaydi va yurtimizdan koronavirus tezroq daf bo‘lishi uchun qo‘ldan kelgancha o‘z hissasini qo‘shadi.

Shu o‘rinda Superliganing boshqa klublarini ham #karantingayordam xeshtegi orqali o‘ziga xos aksiyaga chorlab qolamiz. Zero, bu kasallik faqat koronavirusga chalinganlar muammosi emas, balki hammamiz uchun dolzarb masaladir.

Umid qilamizki, hali quvonchli kunlar oldinda. Koronavirusni yo‘qotish faqat Davlat zimmasidagi ish bo‘lib qolmasdan bunga qarshi barcha kurash olib borishi lozim. Buning uchun sizdan talab qilinadigani uyda qolish va salomatlik gigiyenasiga amal qilishdir.

"So‘g‘diyona" matbuot xizmati.