O‘zbekiston terma jamoasi sardori Odil Ahmedov o‘zi bilan birga o‘ynagan futbolchilardan ramziy terma jamoani tuzib chiqdi. Bu haqda Osiyo futbol konfederasiyasi rasmiy sayti xabar tarqatdi.

Yarim himoyachi ramziy jamoaga 10 nafar o‘yinchini Rossiyaning "Anji" va "Krasnodar" hamda Xitoyning "Shangxay SIPG" klublaridan tanlab olgan bo‘lsa, bir nafarini o‘zbekistonliklar orasidan tanlagan.

Hujum chizig‘ida Aleksandr Geynrixga sherik sifatida kamerunlik futbol yulduzi Samuel Eto'O tanlandi. Hamyurtimiz o‘zining ramziy jamoasiga Andre Villash-Boashni bosh murabbiy etib "tayinladi".

Ahmedov Geynrixga quyidagicha ta’rif berdi: «U aqlli o‘yinchi. Men uchun eng aqlli o‘zbekistonlik futbolchi. Shuning uchun uni tanladim».

Odil Ahmedovning orzular jamoasi:

Darvozabon: Andrey Dikan ("Krasnodar", Ukraina)

Himoyachilar: Yuriy Jirkov ("Anji", Rossiya), Andreas Grankvist ("Krasnodar", Shvesiya), Andrey Yeshchenko ("Anji", Rossiya)

Yarim himoyachilar: Lassana Diarra ("Anji" Fransiya), Oskar ("Shangxay SIPG", Braziliya), Roman Shirokov ("Krasnodar", Rossiya), Xalk ("Shangxay SIPG", Braziliya), Villian ("Anji", Braziliya)

Hujumchilar: Aleksandr Geynrix ("Paxtakor", O‘zbekiston), Samuel Eto'O ("Anji", Kamerun)