5 may. Bu kun zamonaviy futbolning yorqin vakili meksikalik Raul Ximenes tug‘ilgan. 29 ga kirdi.

2018 yilga kelibgina Raul o‘z iqtidorini namoyish eta oldi. Ungacha sang‘igan klublarining soni anchayin ko‘p bo‘ldi. Vatani – Meksikaning "Amerika" klubi tarbiyalanuvchisi bo‘lgani uchun to‘rt yil o‘ynashi tabiiy. Keyin umidli futbolchi sifatida "Atletiko" chorladi o‘ziga.

Madridda yomon mavsum o‘tkazmagan bo‘lsa-da, negadir Simeone tizimiga mos tushmadi. Natijada besh yillik shartnoma bilan "Benfika" sori yo‘l oldi. Portugaliyada ham voqea takrorlandi – ko‘rinishidan yomon o‘yinchi emas, foydali, lekin kutganimizdek emas.

Ijaraga "Vulverxempton" klubiga o‘tayotganida, ichidan alam o‘tgandir. Ammo aynan shu klub butkul Raulning iste’dodini dunyoga ko‘rsatgani hayratlanarli hodisa bo‘ldi — 22 gol, bir mavsumning o‘zida. APLda.

Uning o‘yin uslubini mutaxassislar hozirda o‘rganishmoqda. Zamonaviy hujumchilikning namunasi o‘laroq. U nafaqat sof hujumchi, balki boshqalarga vaziyat ulashishda ham beqiyos. Raqibga orqa o‘girib to‘pni yaxshi ushlab tura oladi va kutilmaganda aldab ketadi. Bir harakat bilan amalga oshirishi natijasida hujumchi Inyesta nomini ham olgan. "Liverpul" darvozasiga urilgan gol yodingizga tushgandir.

Raul Ximenesning bu o‘yinini ko‘rgan "MYU", "Chelsi" va "Tottenhem" rahbarlari qanday qilib uning juda sokin "Vulvz"ga o‘tganiga hayron qolishdi. Tabiatan jim yuradigan yigitning faoliyati ham o‘ziga mos chunki. Terma jamoasiga 81 o‘yin o‘tkazib qo‘ygan va 30 ga yaqinlashgan hujumchining bu qadar keyin porlashi tabiati mahsuli.

Hozirda Zidanning ham pley-listiga kirgan bu iqtidor "bo‘rilar" safidan hech qayerga ketmasligini aytgan. O‘zining aytishicha, zo‘rg‘a topgan baxtini yana yo‘qotib qo‘ymaslik uchun. Bizningcha ham to‘g‘ri qaror. Agar o‘rtaga "Nyukasl" aralashib qolmasa...

Xayrulla Hamidov