O‘zbekiston mezbonlik qiladigan U19 Osiyo chempionati uchun qur’a tashlash marosimi 18 iyun kuni Osiyo Futbol Konfederasiyasining Kuala-Lumpur shahridagi bosh qarorgohida o‘tkaziladi.
Timur Kapadze murabbiyligi ostidagi terma jamoamiz qur’a tashlash jarayonida turnir mezboni sifatida 1-savatchadan o‘rin oladi. Ushbu savatchada shuningdek Saudiya Arabistoni, Janubiy Koreya va Qatar vakillari joy olgan.
Mazkur musobaqada yarim finalga chiqqan 4 jamoa 2021 yil Indoneziyada o‘tadigan yoshlar o‘rtasidagi Jahon chempionatiga yo‘llanmani qo‘lga kiritadi. Agar, indoneziyaliklar chorak final bosqichidan o‘ta olsa, 5-yo‘llanma uchun chorak finalda mag‘lub bo‘lgan jamoalar o‘rtasida pley-off uchrashuvlari o‘tkaziladi.
19 yoshgacha bo‘lgan terma jamoalar o‘rtasidagi ushbu musobaqaga Toshkent, Olmaliq va Namangan shaharlari mezbonlik qiladi. Chempionat bahslari avvaldan belgilanganidek 14-31 oktyabr kunlari bo‘lib o‘tishi rejalashtirilgan.
Ayni paytda, O‘zbekiston U19 terma jamoasi Osiyo chempionatiga hozirlik jarayonini qisqa tanaffusdan so‘ng qayta boshladi. 15 iyunga qadar yoshlar terma jamoamiz poytaxtimizdagi “Chig‘atoy” bazasida o‘z mashg‘ulotlar davom ettiradi.
U19 Osiyo chempionati-2020. Qur’a tashlash marosimi – Kuala-Lumpur, Malayziya
18-iyun, soat 13.30 (Toshkent v.b.)
1-savatcha: O‘zbekiston, Saudiya Arabistoni, Janubiy Koreya, Qatar
2-savatcha: Yaponiya, Tojikiston, Avstraliya, Indoneziya
3-savatcha: Malayziya, Iroq, Vyetnam, Kombodja
4-savatcha: Eron, Yaman, Bahrayn, Laos.
