«Napoli» prezidenti Aurelio De Laurentis jamoaning sobiq bosh murabbiyi Maurisio Sarrini tanqid qildi.

"Sarri o‘zining pul haqidagi bahonalari bilan meni g‘azablantirgan edi. U menga xiyonat qildi. Uning "Napoli" bilan shartnomasi tugashiga hali ikki yil bor edi. Fevral oyida u Toskandagi uyi yaqiniga meni tushlikka taklif qildi. U xotini bilan barchasini yaxshi tashkil qilgan edi. Biz ko‘p narsalar haqida gaplashdik, ammo u klubni tark etishi niyati borligini menga aytmagandi. Maurisio oxirgi o‘yinga qadar sukut saqlab, klubda xavotir va ishonchsizlikni yuzaga keltirdi.

Albatta, Sarri boshqaruvidagi 3ta ajoyib mavsumni unutmaslik kerak. Lekin futbolda ham kinodagi qoidalarga amal qilinadi. Yaxshi film yaratish uchun yaxshi rejissyor, ajoyib prodyuser kerak. Ular a’lo darajadagi ijodning ota-onasi hisoblanishadi.

Tabiiyki, klub rahbari ham muvaffaqiyatning bir qismi hisoblanadi, agar u xatolarga yo‘l qo‘ymasa. Kavani bilan kim shartnoma imzoladi? Kim Massarrini taklif qildi? Kim Benites va Iguain bilan kelishuvga erishdi? Kim Sarrini bosh murabbiylikka tayinladi?

Shuni unutmangki, Maurisioni jamoaga taklif qilganimda, butun shahar menga qarshi norozilik bannerlarini ko‘targan edi", - dedi De Laurentis "Corriere dello Sport"ga bergan intervyusida.