«Наполи» президенти Аурелио Де Лаурентис жамоанинг собиқ бош мураббийи Маурицио Саррини танқид қилди.

"Сарри ўзининг пул ҳақидаги баҳоналари билан мени ғазаблантирган эди. У менга хиёнат қилди. Унинг "Наполи" билан шартномаси тугашига ҳали икки йил бор эди. Февраль ойида у Тоскандаги уйи яқинига мени тушликка таклиф қилди. У хотини билан барчасини яхши ташкил қилган эди. Биз кўп нарсалар ҳақида гаплашдик, аммо у клубни тарк этиши нияти борлигини менга айтмаганди. Маурицио охирги ўйинга қадар сукут сақлаб, клубда хавотир ва ишончсизликни юзага келтирди.

Албатта, Сарри бошқарувидаги 3та ажойиб мавсумни унутмаслик керак. Лекин футболда ҳам кинодаги қоидаларга амал қилинади. Яхши фильм яратиш учун яхши режиссёр, ажойиб продюсер керак. Улар аъло даражадаги ижоднинг ота-онаси ҳисобланишади.

Табиийки, клуб раҳбари ҳам муваффақиятнинг бир қисми ҳисобланади, агар у хатоларга йўл қўймаса. Кавани билан ким шартнома имзолади? Ким Маццаррини таклиф қилди? Ким Бенитес ва Игуаин билан келишувга эришди? Ким Саррини бош мураббийликка тайинлади?

Шуни унутмангки, Маурициони жамоага таклиф қилганимда, бутун шаҳар менга қарши норозилик баннерларини кўтарган эди", - деди Де Лаурентис "Corriere dello Sport"га берган интервьюсида.