Stadion.uz Markaziy Osiyodagi eng qimmat futbolchilar ro‘yxati bilan tanishtirib o‘tadi.
Ayni damga kelib Transfermarket portali futbolchilarning narxini belgilab beruvchi norasmiy manbaga aylanib ulgurdi. Agar ushbu nashr bergan ma’lumotlarga suyanadigan bo‘lsak, markaziy Osiyo davlatlaridagi eng qimmat futbolchilar kim? Bugun ushbu savolga qisqacha javob berib o‘tamiz.
Turkmaniston — Ruslan Mingazov – 525 ming yevro
Turkmanistonlik futbolchi ayni damda Qozog‘istonning “Irtish” jamoasi sharafini munosib himoya qilib kelmoqda. Undan keyingi o‘rinni O‘zbekiston chempionatida to‘p surayotgan Arslanmurod Amanov egallab turibdi. Nemis nashri talqiniga ko‘ra, Amanovni qo‘lga kiritishni istagan klub 400 ming yevrodan voz kechishi talab etiladi. Kuchli uchlikni o‘tgan mavsumda Qirg‘iziston chempionatining to‘purariga aylangan Vohit Orazsahedov egallab turibdi. Uning transfer qiymati 250 ming yevroga teng.
Turkmaniston terma jamoasi futbolchilarining umumiy transfer qiymati 2,53 million yevroga teng.
Tojikiston — Parvizjon Umarboyev – 600 ming yevro
Bugungi kunda qo‘shni Tojikiston futbolining yuziga aylanib borayotgan Parvizjon Umarov o‘z mamlakatidagi eng qimmat futbolchi sanaladi. Ayni damda Bolgariyaning “Lokomotiv” klubi sharafini himoya qilayotgan futbolchining transfer qiymati 600 ming yevroga baholanmoqda. Undan keyingi o‘rinlarni Dushanbening “Istiqlol” klubi futbolchilari Alisher va Iskandar Jalilovlar (300 ming yevro) bo‘lishib olishmoqda. Shuningdek, Amirbek Jumaboyev va Nuriddin Davronovlarni ham transfermarket nashri 300 ming yevoroga baholagan.
Tojikiston terma jamoasining umumiy transfer qiymati 4,9 million yevroga teng.
Qirg‘iziston — Valeriy Kichin – 950 ming yevro
Moskvaning “Torpedo” jamoasi futbolchisi bundan bir necha hafta ilgari 1,2 million yevroga baholanayotgan edi. Endilikda, uning yoshi kattalashgani bois Transfermarket portalidagi narxi biroz pastladi. Qozog‘iston chempionatidagi o‘yinlari bilan ko‘pchilikning e’tiboriga tushgan Guljigit Aliqulov (275 ming yevro) va Indaneziya chempionatida top suruvchi Temirlan Qo‘ziboyev (250 ming yevro)lar kuchli uchlikni yakunlab bermoqda.
Qirg‘iziston terma jamoasi futbolchilarining umumiy transfer qiymati 4,23 million yevroga teng.
Qozg‘iston — Baurjan Islamxan – 2,16 million yevro
Qozog‘iston futbolchilari orasidagi eng taniqlisi sanaluvchi Baurjan Islamxan bugungi kunda BAA chempionatida to‘p tepmoqda. “Al-Ayn” klubi futbolchisini qo‘lga kiritishni istagan klub 2,16million yevrodan voz kechishi talab etiladi. Undan keyingi o‘rinni “Astana” klubi qanot himoyachisi 30 yoshli Dmitriy Shomko egallamoqda. O‘tgan yili 2,5 millionga baholangan futbolchining ayni damdagi qiymati 2 million yevroga teng. Kuchli uchlikni “Rostov” jamoasi futbolchisi Baxtiyor Zaynutdinov (1,35 illion yevro) egallab turibdi.
Qozog‘iston terma jamoasining transfermarketdagi umumiy qiymati 20 million yevro atorifida baholanmoqda.
O‘zbekiston — Eldor Shomurodov – 5,2 million yevro
Rossiyaning “Rostov” jamoasi hujumchisi Eldor Shomurod ayni damda O‘rta Osiyodagi eng qimmat futbolchi sanaladi. Uning transfer qiymati 5,2 million yevroga teng, biroq uni qo‘lga kiritishni istagan klub 10 million atrofida tavol puli to‘lashi lozim. Undan keyingi o‘rinni 2 million yevro transfer narxi bilan Odil Ahmedov egallab turibdi. Kuchli uchlikni 1,40 million yevroga baholongan Jaloliddin Masharipovga nasib etgan.
Ajablanarlisi shundaki, transfermarket nashri O‘zbekiston milliy terma jamoasiga mamlakatning eng qimmat futbolchilarini kiritmagan. Terma jamoamizning asosini olimpiadachilar tashkil etgani bois, umumiy transfer qiymati 9,73 million yevroga teng.
