Coca Cola Superliganing 6-turidan o‘rin olgan «Bunyodkor» - «Lokomotiv» (2:0) uchrashuvidan keyin o‘tkazilgan matbuot anjumaning birinchi qismida mehmonlar ustozi Andrey Fyodorov ishtirok etdi.

- Uchrashuvning dastlabki 15 daqiqasida maydon egalari katta ustunlikka ega bo‘lishdi. Shundan so‘ng bizda ustunlik bo‘ldi, ammo bu ko‘proq mezbonlarning o‘yin tempini biroz pasaytirishi bilan bog‘liq. Futbolchilarim bugun yakka kurashlarda mag‘lub bo‘ldi. Fikrimcha, bugun shu sababdan mag‘lubiyatga uchradik. Qolaversa, maydon markazida juda ko‘p qo‘pol xatolarga yo‘l qo‘ydik. Og‘ir mag‘lubiyat bo‘ldi. Hozir taktika, paslar yoki boshqalar haqida gapirishning mavridi emas. O‘yinimizni kuchaytirishga qiynalyapmiz. Ketma-ket oltinga teng ochkolarni yo‘qotyapmiz. Bu esa mavsum yakunida katta ta’sir o‘tkazishi mumkin. Mana uchinchi o‘yinki tezkor gol o‘tkazib yuboryapmiz. Shundan so‘ng o‘yinimiz buzilyapti. Vaholanki, «Lokomotiv» bunday o‘yin ko‘rsatadigan darajadagi jamoa emas.