Bugun AGMK Olmaliqda Superliga doirasidagi navbatdagi muhim bahsni o‘tkazadi.

Mirjalol Qosimov boshchiligidagi AGMK Ro‘ziqul Berdiyev boshqaruvidagi “Nasaf”ni mehmon qiladi.

Superligada yuqori o‘rinlar uchun jiddiy kurashayotgan jamoalar, hozircha mag‘lubiyat nimaligini bilmay kelayotgan bu ikki raqib o‘rtasidagi to‘qnashuv nafaqat turning, balki joriy mavsum hozirgacha o‘tkazilgan uchrashuvlar ichida eng markaziy bellashuvga aylanadi.

G‘alaba har ikkala jamoa uchun 8-tur oldidan 2-o‘rinni kafolatlaydi va ehtimoliy peshqadamga ham aylantirishi mumkin.

Raqib - “Nasaf” mavsumni 3 g‘alaba bilan boshlab, karantinga peshqadam sifatida yo‘l oldi. Karantindan keyingi restartda esa durang qayd etish bo‘yicha xet-trikni rasmiylashtirib, jami 12 ochko to‘pladi.

AGMK mavsumni dastlab 2 durang bilan boshlab, karantin oldidan Olmaliqda “Bunyodkor”ga imkoniyat qoldirmagan holda g‘alabani tantana qilgandi. Karantindan keyingi restartni esa jamoamiz g‘alaba qozonish bo‘yicha xet-trik qayd etgan holda davom ettirayotgan yagona jamoa. Bu gal restartdagi xet-trikni pokerga aylantirish asosiy maqsad. Ya’ni, bugun faqat va faqat g‘alaba ilinjidamiz!

AGMK o‘yinga jiddiy va qizg‘in hozirlik ko‘rdi. Elguja jamoaviy mashg‘ulotlarga qaytgan va bugun maydonga tushish ehtimoli mavjud. Yovan Jokichda kichik jarohat borligi sababli kechagi mashg‘ulotda qatnashmadi.

AGMK navbatdagi o‘yinga, turning markaziy to‘qnashuviga tayyor. Mas’uliyatli va qiziqarli bahsga har bir futbolchi katta ishtiyoq bilan taraddud ko‘rdi.

O‘yin karantin qoidalariga muvofiq tomoshabinlarsiz o‘tishi munosabati bilan AGMK muxlislari uchrashuvni oila davrasida o‘tirib, «Oilaviy» kanal orqali soat 20:00dan boshlab tomosha qilishlari mumkin!