Soligorskning "Shaxtyor" klubi a’zosiga aylangan Jasur Yaxshiboyev yangi jamoasi bilan shartnoma imzolagach o‘z fikrini bildirib o‘tdi.

— Jasur, taqdiringizni Belarusning turli jamoalari bilan bog‘lashayotgan edi. Ammo siz "Shaxtyor"ni tanladingiz. Nima uchun?
— "Shaxtyor"ga o‘tganimdan xursandman. Ha, mening BATE, "Dinamo-Brest" klublari o‘tishim mumkinligi haqida mish-mishlar bor edi. Men esa "Shaxtyor"ni tanladim. Bor gap shu.

— Siz yarim yildan beri Belarus chempionatida o‘ynayapsiz. Yangi jamoaga o‘tish haqida qaror qabul qilish qiyin kechdimi? Bu borada kim bilan maslahatlashdingiz?
— Ha, o‘zing yaxshi bilmagan jamoaga o‘tish haqida qaror qabul qilish oson emas. Oldinda seni nimalar kutib turganini bilmaysan. Oilam bilan maslahatlashib, "Shaxtyor" variantini tanladim.

— Yevropa ligasida o‘ynash imkoniyati siz uchun qo‘shimcha motivasiya bo‘ldimi?
— Albatta, har bir futbolchi Yevropa ligasi, Yevropa chempionlar ligasida o‘ynashni istaydi. Bu endi yuqori daraja. Jamoa Yevropa ligasida ishtirok etishini bilardim.

— Joriy mavsumda saralash bosqichlari faqat bitta o‘yindan iborat bo‘ladi. Bunga munosabatingiz qanday?
— Bunda bitta o‘yin keyingi bosqich taqdirini hal qiladi. Shundan kelib chiqib, jamoaga o‘zini jangga tayyorlaydi.

— Siz 12-turda "Shaxtyor"ga qarshi o‘yinda ishtirok etdingiz. O‘sha bahsdan nimalar yodda qoldi?
— "Shaxtyor" bizga nisbatan jiddiy tayyorgarlik ko‘rib, birinchi bo‘limda umuman bizga o‘yin bermagandi.

— Siz "Shaxtyor" hujumchisi Vitaliy Lisakovich bilan to‘purar poygasida peshqadamlik qilyapsiz. Kim mavsumning eng yaxshi to‘purari bo‘ladi, deb o‘ylaysiz?
— Ko‘pchilik shu savolni beryapti. Avvalo jamoa g‘alabasi haqida o‘ylashimiz kerak. O‘ylaymanki, bahs davomida kimda yaxshiroq imkoniyat yuzaga kelsa, bir-birimizga uzatma beramiz. Yakunda kim eng yaxshi to‘purar bo‘lishini vaqt ko‘rsatadi.

— Yangi jamoada o‘z oldingizga qanday vazifa qo‘yyapsiz?
— Birinchi navbatda bu jamoaning g‘alaba qozonishi uchun yordam berishni ko‘zlayapman. "Shaxtyor" safida ham o‘zimni ko‘rsatib, mamlakat chempionligini qo‘lga kiritishni niyat qilyapman.