Солигорскнинг "Шахтёр" клуби аъзосига айланган Жасур Яхшибоев янги жамоаси билан шартнома имзолагач ўз фикрини билдириб ўтди.

— Жасур, тақдирингизни Беларуснинг турли жамоалари билан боғлашаётган эди. Аммо сиз "Шахтёр"ни танладингиз. Нима учун?
— "Шахтёр"га ўтганимдан хурсандман. Ҳа, менинг БАТЭ, "Динамо-Брест" клублари ўтишим мумкинлиги ҳақида миш-мишлар бор эди. Мен эса "Шахтёр"ни танладим. Бор гап шу.

— Сиз ярим йилдан бери Беларусь чемпионатида ўйнаяпсиз. Янги жамоага ўтиш ҳақида қарор қабул қилиш қийин кечдими? Бу борада ким билан маслаҳатлашдингиз?
— Ҳа, ўзинг яхши билмаган жамоага ўтиш ҳақида қарор қабул қилиш осон эмас. Олдинда сени нималар кутиб турганини билмайсан. Оилам билан маслаҳатлашиб, "Шахтёр" вариантини танладим.

— Европа лигасида ўйнаш имконияти сиз учун қўшимча мотивация бўлдими?
— Албатта, ҳар бир футболчи Европа лигаси, Европа чемпионлар лигасида ўйнашни истайди. Бу энди юқори даража. Жамоа Европа лигасида иштирок этишини билардим.

— Жорий мавсумда саралаш босқичлари фақат битта ўйиндан иборат бўлади. Бунга муносабатингиз қандай?
— Бунда битта ўйин кейинги босқич тақдирини ҳал қилади. Шундан келиб чиқиб, жамоага ўзини жангга тайёрлайди.

— Сиз 12-турда "Шахтёр"га қарши ўйинда иштирок этдингиз. Ўша баҳсдан нималар ёдда қолди?
— "Шахтёр" бизга нисбатан жиддий тайёргарлик кўриб, биринчи бўлимда умуман бизга ўйин бермаганди.

— Сиз "Шахтёр" ҳужумчиси Виталий Лисакович билан тўпурар пойгасида пешқадамлик қиляпсиз. Ким мавсумнинг энг яхши тўпурари бўлади, деб ўйлайсиз?
— Кўпчилик шу саволни беряпти. Аввало жамоа ғалабаси ҳақида ўйлашимиз керак. Ўйлайманки, баҳс давомида кимда яхшироқ имконият юзага келса, бир-биримизга узатма берамиз. Якунда ким энг яхши тўпурар бўлишини вақт кўрсатади.

— Янги жамоада ўз олдингизга қандай вазифа қўйяпсиз?
— Биринчи навбатда бу жамоанинг ғалаба қозониши учун ёрдам беришни кўзлаяпман. "Шахтёр" сафида ҳам ўзимни кўрсатиб, мамлакат чемпионлигини қўлга киритишни ният қиляпман.