Coca Cola Superligasi 9-turi doirasidagi "Qo‘qon-1912" - "Nasaf" uchrashuvidan keyingi matbuot anjumanining birinchi qismida "Nasaf" bosh murabbiyi Ro‘ziqul Berdiyev qatnashdi.

"O‘ylamanki, bugun har ikki jamoa ham o‘z saviyasiga yarasha o‘yin namoyish etishdi. Ikki jamoa ham yaxshi o‘ynadi. Ikki marta hisobda oldinda borib, g‘alabani qo‘ldan chiqarish alamli bo‘ldi. O‘yin teng kurashlar ostida o‘tdi. Uchrashuv oxirida mezbonlar ham g‘alabani ilib ketishlari mumkin edi. Bu yil Qo‘qonda juda yaxshi jamoa shakllangan. O‘yinlarini kuzatganimizda shunga amin bo‘ldikki, jamoa jangovor ruhda o‘yin ko‘rsatmoqda. Aytishimiz kerakki, har ikki golda ham darvozabonlarimiz xato qilishdi. Biz bunday xatolarni kutmagan edik.

Bugun boshlang‘ich tarkibda uchta o‘zgarish qilishimizning asosiy sababi ayrim futbolchilarimizning jarohati bor edi. Qolaversa, yoshlarga imkon berishga harakat qilpyamiz. Aliqulov biroz betob edi. Rahmatullayevni o‘rniga esa Akmal Mozgovoyni tushirdik, Akmal bugun yomon o‘ynamadi va uchinchi o‘zgarish Bobur Abduxoliqov bilan bog‘liq. Bobur barcha o‘yinlarda maydonga tushib kelmoqda va unda charchoq alomatlari sezilmoqda.

Mashg‘ulotlarni salqin paytda o‘tkazish mumkin. Lekin rasmiy o‘yinlarda bunday qilib bo‘lmaydi. Yoz oyida o‘ynash oson emas. Issiqda o‘ynash futbolni tempini pasaytiradi. Ammo bu vaqtinchalik holat deb o‘ylayman. Hozir vaziyat shunaqa. Qolaversa, o‘yinlar muxlislarsiz ham bo‘lmoqda. Ammo o‘yinlarning televizor orqali jonli namoyish etilayotgani ham muxlislarga manzur bo‘lmoqda. Bugungi jangovar o‘yindan muxlislar zavq olishmoqda, deb o‘ylayman.

Yoshlarga ko‘proq imkoniyat berish kerak, deb hisoblayman. Bu ularning o‘ziga bo‘lgan ishonchini ortiradi.

Markazlashgan bahslar haqida shuni aytishim lozimki, vaziyat og‘irlashsa, o‘yinlarni to‘xtatib turish kerak. Lekin o‘yinlar qanday reglamentda bo‘lsa shu holatda davom ettirish tarafdoriman", — dedi Ro‘ziqul Berdiyev.