«Manchester Yunayted» karantindan keyin, dastlabki 6 o‘yinda 5 g‘alaba va 1 durang qayd etdi. To‘plar nisbati - 17 ga 4.
Keyingi 4 o‘yinda esa, 1 g‘alaba, 2 durang, 1 mag‘lubiyat. To‘plar nisbati - 6 ga 6.
Pasayish aniq ko‘rinib turibdi va buni asosan tarkibda charchoq alomatlari bilan bog‘layapti. Buni ayniqsa, oxirgi o‘yindagi Reshford, Matich yoki Fernandeshning holatidan payqash qiyin bo‘lmadi.
Rostan ham, Sulsher rotasiya va almashtirishlarni deyarli ignor qilyapti, qatorasiga besh o‘yinni bir xil tarkib bilan boshlagan paytlar bo‘ldi. Ayniqsa, har uch kunda o‘ynaladigan (MYU 32 kunda 10 marta maydonga tushdi) taqvimda buning ta’siri sezilishi turgan gap edi.
Albatta, bu asosiy sabab, lekin bu kamchiliklarni yaxshigina maskirovka qilish mumkin bo‘lgan yana bir faktorga putur yetganini ham unutmaslik kerak. Lyuk Shouni.
Chap qanot himoyachisi "Manchester Yunayted"da himoyalanishdan ko‘ra, to‘p nazoratida ulkan ta’sirga ega bo‘lgan murvatlardan biri edi. Aynan Shouning to‘p bilan ishonchli harakatlari evaziga "MYU" to‘pni yaxshi nazorat qilayotgandi. Har o‘yinda Lyuk Shou raqib maydonida amalga oshirilgan paslar bo‘yicha jamoaning uchligiga kirayotgandi.
«Sautgempton»ga qarshi o‘yinning 75-daqiqasida Shou jarohat oldi. "MYU"ning o‘sha o‘yinda g‘alabani qo‘ldan chiqargani dastlabki zarba bo‘lsa, keyingi o‘yinlarda umuman o‘yin kartinasi o‘zgardi.
- Shou qatnashgan o‘yinlarda "MYU" to‘pni o‘rtacha 65-68 foiz nazorat qilayotgandi. Shousiz keyingi to‘rt o‘yinda to‘p nazorati 55-58 ga tushib ketdi.
- Uning o‘rniga maydonga tushgan Fosu Mensa ham, Uilyams ham, ishonchni oqlay olishmayapti. Ayniqsa, Matich, Pogba va Fernandesh bilan bog‘lamlarda yaqqol sezilyapti.
- Shou bilan chap qanotda yaxshi tandem hosil qilgan Markus Reshfordning ham o‘yinlari chiqmayapti.
Albatta, hech qaysi murabbiy o‘z muammolarini bir futbolchining yo‘qligiga bog‘lab, intervyu bermaydi. Lekin menimcha, Lyuk Shouni hammadan ham Sulsher kutayotgan bo‘lishi ehtimol.
Aytishlaricha, "Manchester Yunayted" «Lester»ga qarshi hal qiluvchi bahsga tayyorgarlikka kirishgan va Shou ham jarohatidan tiklanib ulgurdi. So‘nggi turda biz ikki hafta oldingi jamoani ko‘rsak ajab emas.
Qahramon Aslanov.