Xabaringiz bor, 10 avgustdan e’tiboran mamlakatimizda transfer oynasi ochildi.

Mavsumning ikkinchi qismini yanada ishonchli o‘tkazishni maqsad qilgan «Bunyodkor» ilk transferni amalga oshirdi. O‘tgan mavsumni «Bunyodkor»da o‘tkazib, ishonchli o‘yinlari va gollari bilan jamoaning muvaffaqiyatiga ulkan hissa qo‘shgan Xurshid G‘iyosov yana toshkentliklar safida. Yil avvalida Janubiy Koreyaning «Anyang» klubi bilan shartnoma imzolab, mavsumning birinchi qismini legioner sifatida o‘tkazgan yarim himoyachi yana «qaldirg‘och»ga aylandi. Futbolchi bilan bir yilga mo‘ljallangan shartnoma imzolandi.

Shuningdek, mavsum boshida ijara asosida «Nasaf»dan «Bunyodkor» safiga kelib qo‘shilgan Humoyun Murtazoyev va Sardor Abduraimov bilan o‘zaro kelishuvga ko‘ra xayrlashildi. Ma’lum bo‘lishicha, har ikkala futbolchi ham faoliyatini yana «Nasaf»da davom ettiradi.