Ushbu ruknimizdagi eng so‘nggi yangiliklar bilan tanishtirishda davom etamiz.
“Yuve” “Atalanta” futbolchisini nishonga oldi
Turinning “Yuventus” klubi “Atalanta” hujumchisi Duvan Sapatani o‘z tarkibiga qo‘shib olish ilinjida.
“Le Gazzeta Della Sport” nashri bergan ma’lumotlarga qaraganda, “zebralar” Sapata uchun rasman “Atalanta”ga 30 million yevro taklif qilmoqda.
Manbaning ma’lum qilishicha, “Atalanta” o‘z hujumchisini 55 million yevrodan kamiga sotmoqchi emas.
“Aston Villa”dan rekord
Angliyaning “Aston Villa” klubi “Seltik” hujumchisi Odson Eduar uchun 30 million yevro sarf etmoqchi.
Agar ushbu transfer amalga oshsa, hujumchi klub tarixidagi eng qimmat transferga aylanadi.
O‘tgan mavsumda Shotlandiya chempionatida 28 ta gol kiritgan hujumchi bilan bir nechta APL klublari qiziqib qolgan. “Aston Villa”dan tashqari, “Lester” va “Kristal Pelas” jamoalari ham Eduar uchun da’vogarlik qilmoqda.
Yan Oblak qoladimi?
Madridning “Atletiko” klubi darvozaboni Yan Oblak Londonning “Chelsi” klubida ko‘rinish berishi mumkin.
Ispaniya nashrlarining ma’lum qilishicha, kipper “Atletiko”ning kelajagiga shubha bilan boqmoqda va boshqa klubga o‘tishga qarshi emas.
“Marca” nashrining ma’lum qilishicha, darvozabonning tavon pulini faqat “Chelsi” yoki PSJ jamoalaridan biri to‘lashga qodir.
Eslatib o‘tamiz, Yan Oblakni qo‘lga kiritishni istagan klub, Madrid jamoasiga 100 million yevro to‘lashi lozim.
Kalyexon ortga qaytmoqda
Italiyaning “Napoli” klubida 7 yil davomida muvaffaqiyatli harakat qilgan Xose Kalyexon faoliyatini Ispaniyada davom etiradi.
“Mundo Deportivo”ning ma’lum qilishicha, erkin agentga aylangan futbolchi “Vilyareal” bilan shaxsiy shartnoma borasida kelishuvga erishgan.
Manbaning ma’lum qilishicha, Xose yangi jamoasi bilan 2+1 ko‘rinishidagi shartnomaga imzo chekadi.
Reyna hali yakunlamadi!
Ispaniyalik taniqli darvozabon Pepe Reyna o‘z faoliyatini Rimning “Lasio” jamoasida davom etirmoqchi.
Ayni damda, Reynaning transfer huquqlari “Milan” jamoasiga qarashli bo‘lib, ortda qolgan mavsumni ispaniyalik darvozabon “Aston Villa”da o‘tkazdi. Aynan uning ishonchli o‘yinlari sababli, jamoa APLda jon saqlab qolishni uddaladi.
“Calciomercato” nashri bergan ma’lumotlarga qaraganda, Reyna allaqachon Rim klubi bilan shaxsiy shartnoma borasida kelishuvga erishib bo‘lgan.
