AQSHning "Bleacher Report" nashri jurnalistlari change.org sayti orqali "France Football" jurnalidan 2020 yilgi "Oltin to‘p" sovrini uchun tanlovni o‘tkazishni so‘rab petisiya (jamoaviy iltimosnoma) tashkil etishdi.

Eslatib o‘tamiz, "France Football" iyul oyida bayonot tarqatib, 2020 yilda "Oltin to‘p" sovrini hech kimga topshirilmasligini ma’lum qilgan edi. Buning sababi sifatida nashr pandemiya sharoitida barcha bir xil sharoitga ega bo‘lmasligini ta’kidlagan edi.

«2020 yil barcha uchun og‘ir bo‘ldi. Ammo bunday sharoitda "France Football" sovrinni topshirmaslikka qaror qilganini tushunish qiyin. Mavsum qayta boshlanganidan keyin top-futbolchilar o‘z o‘yinlari orqali muxlislarni xursand qilishdi. Chiro Immobile (»Lasio") «Oltin butsa»ni qo‘lga kiritdi. «Liverpul»ning aqlbovar futbolchilari Mane, Saloh, Aleksandr-Arnold va Virjil van Deyk 30 yil ichida ilk marta APLda g‘olib chiqishdi. Messi va Ronaldu esa o‘z faoliyatlarini davom ettirishmoqda. Va albatta, «Bavariya» Robert Levandovskining gollari evaziga o‘zi ishtirok etgan barcha musobaqalarda g‘alaba qozondi.

Bu o‘yinchilar qiyin pallada insonlarga xursandchilik ulashishdi. Shuning uchun 2020 yilda «Oltin to‘p» sovrinini eng yaxshi o‘yinchiga topshirishingizni so‘raymiz", — deyiladi petisiyada.