O‘zbekiston futbol assosiasiyasi Hakamlar va nazoratchilar boshqarmasining O‘zbekiston Superligasi 13-tur uchrashuvlariga bag‘ishlangan yig‘ilish bayonnomasiga binoan ikki nafar hakam chetlatildi.

"Buxoro" – "AGMK" uchrashuvida ishlagan Vadim Agishevning harakatlari boshqarma tomonidan sinchkovlik bilan o‘rganib chiqildi. Bir necha vaziyatlarda Agishev jiddiy hatoga yo‘l qo‘ygani va o‘yin tizginini qo‘ldan chiqarib yuborgani aniqlandi. Shu sababli, unga Superliga o‘yinlaridan chetlatilish intizomiy jazosi belgilandi.

Shuningdek, "Navbahor" – "Qo‘qon-1912" o‘yini bosh hakami Viktor Serazetdinovning ishida ham jiddiy kamchiliklar aniqlandi. Uning o‘yin davomida yo‘l qo‘ygan hatolari bevosita natijaga ta’sir qildi. Serazetdinovga nisbatan Superligadan chetlatilish va quyi ligaga tushirib yuborish intizomiy jazosi tayinlandi.

Shu o‘rinda eslatib o‘tamiz, O‘FA hakamlar boshqarmasi milliy chempionatlarimiz har bir o‘yinining har daqiqasini sinchkovlik bilan ko‘rib, o‘rganib chiqmoqda va hakamlar harakatini atroflicha tahlil etmoqda.

Hatoga yo‘l qo‘yilgan holatlarda hakamlarga tegishli intizomiy jazo belgilanyapti. O‘z ishiga loqayd mutaxassislarga nisbatan jiddiy ogohlantirishdan tortib, chetlatilishgacha bo‘lgan choralar qo‘llanilmoqda.