Pro liga 6-turining markaziy uchrashuvida «Dinamo» jamoasi turnir peshqadamlaridan biri «Turon» klubi ustidan ustidan muhim g‘alabaga erishdi. O‘yindan keyin Samarqand jamoasi bosh murabbiyi Sergey Lushchan bahs borasidagi taassurotlari bilan o‘rtoqlashdi.

- Avvalgi o‘yinlarimizdek bu bahs ham ancha qiyin o‘tdi. Biz vaziyatimizdan foydalanib gol urdik, raqib esa yo‘q. O‘ylagan va rejalashtirgan ishlarimizni qisman bajardik. Himoyada ham raqibga aytarli imkoniyat bermadik. Bu o‘yinda biz asosan standartlarga katta e’tibor qaratgandik, bu borada qator imkoniyatga ham ega bo‘ldik. Standart vaziyatlar bizning ustunliklarimizdan biri, bundan foydalanishimiz shart edi. Ikkinchi bo‘limdagi o‘zgarishlar o‘yinimizga ta’sir qildi. Ochig‘ini aytsam, oxirgi vaziyatlardan birigacha «infarkt» bo‘lishimga sal qoldi. Yigitlarga jiddiy e’tirozim yo‘q.

Umuman olganda esa o‘yindan ham, natijadan ham qoniqdim. Chunki bugun o‘yinni himoyadan qurishga intildik. Sababi «Turon» hujumkor jamoa edi, ayniqsa qarshi hujumlarda tezkor edi. Ammo futbolchilarimiz ularga qanotlarda ham, markazda ham deyarli imkoniyat berishmadi. Ha, xatolarimiz bor, buni muhokama qilamiz. Hozircha biz uchun asosiysi natija. Jamoamdan chiroyli o‘yin talab qilishimga hali vaqtli.

Jahongir Ahmadov, Suhrob Nurulloyev, Oybek Nurmatov, Azamat Allaniyozovning zaxiradan tushirilishi? Ha, bu ham ikkinchi bo‘limdagi rejalarimizdan biri edi. Chunki jamoaning aksariyat chiziqlari 70 daqiqadan keyin bahs boshidagidek o‘yin namoyish eta olmasligi ma’lum edi. Biz tarkibda o‘zgarishlar qilishda davom etamiz. O‘zgarishlar samara berdi va yakunda g‘alaba qozondik.

«Sho‘rtan» bilan o‘yinimiz? Birorta o‘yinimiz yo‘qki, bizga oson bo‘lgan bo‘lsa. Har bir bahsda katta kuch va ulkan mehnat evaziga g‘alaba qozonayapmiz. Ishlashda va maqsad sari olg‘a borishda davom etamiz.

Usmon Ibodov yozib oldi.