APL yangi mavsumida ilk sharhlagan o‘yinim — "Brayton" - "Chelsi" bo‘ldi.

Hamma London klubining yangi futbolchilari qanday debyut qilar ekan, deb turgan vaqtda meni mezbonlar tarkibidagi yigirmaga  to‘lmagan yigitchaning o‘yini ijobiy ajablantirdi. O‘ng qanot himoyachisi ampluasida ko‘rsatilgan - Toriq Lempti.  

Tezkor, individual, chayir va taptortmas Lempti o‘yinda o‘zi uchun sevimli "Chelsi" jarima maydoniga kirib Alonso va Zuma uchun bosh og‘rig‘i bo‘ldi. Sevimliligi boisi u yetti yoshida "Chelsi" akademiyasiga kelib qo‘shilgan. Kattalar jamoasiga uni aynan Lempard jalb qilib, o‘tgan mavsum "Arsenal"ga qarshi murakkab o‘tayotgan o‘yinda uni maydonga tushirgan. Oqibat klub g‘alabani ilib ketgan o‘shanda.

Joriy yil esa "Brayton" bilan 4 yillik shartnoma imzoladi.

Men uning o‘yinini ko‘rib Dani Alvesni esladim. To‘g‘ri, faoliyatidagi 40 ta titul bilan Alves qayerda-yu, bu mitti Lempti qayerda?! Ammo, Toriqning maydondagi ko‘z ilg‘aydigan harakatlari xotiramdagi Daniga oid sahifalarning ochilishiga sabab bo‘ldi. Boshqa tomondan qaralsa, yoshlarning bunday otilib chiqishi ko‘p uchraydi aslida. So‘nggi o‘n yilda chiqqan "yangi Ronaldu" yoki "yangi Messi"lar sanoqsiz. Buyog‘iga ko‘raylikchi, uyg‘ongan taassurot rostmi yoki yolg‘on. Toriq Lemptini bunday keyin ham o‘zim uchun alohida kuzataman.

Siz ham bir ko‘rib boqing!

Orif Tolipov.