Stadion.uz bu mavsumda Bundesliga o‘yinlarini yanada qizg‘in o‘tishini ta’minlab beruvchi futbolchilar bilan tanishtirib o‘tadi.

«Bavariya» – Leroy Sane

Myunhen klubining hujum chizig‘i kishi ko‘zini qamashtirishi turgan gap. Shunday bo‘lsada, yangi mavsumda klub Perishich va Koutinyolarning hizmatidan foydalana olmaydi. Ular ortga, o‘z klubiga qaytib ketishdi. Myunhen klubi esa, bu yigitlarning o‘rnini «Manchester Siti» vingeri Leroy Sane bilan to‘ldirishga qaror qildi. O‘tgan mavsumda Koman, Levandovski, Myuller va Gnabrilar barcha sovrinlarni o‘ziniki qilib oldi. Sane esa, katta g‘alabalarga juda o‘ch. Boz ustiga, uzoq muddat jarohatidan forig‘ bo‘lgan futbolchi yashil maydoni juda sog‘ingan. Agar hammasi reja asosida ketsa, Sane o‘zi shundoq ham hujumkor jamoani yanada keskin to‘p surishi uchun imkon yaratishi lozim.

«Borussiya Dortmund» – Erling Xoland

Norvegiyalik to‘purar yanvar oyida Dortmundga ko‘chib o‘tdi va darrov nimalarga qodir ekanligini ko‘rsatib qo‘ydi. 18 ta o‘yin va 16 ta gol. 20 yoshli futbolchini allaqachon dunyoning eng kuchli markaziy hujumchilari qatoriga qo‘shib qo‘yishdi. Xoland bu statusni ushlab qolish uchun ham kelasi mavsumda har bir o‘yinda ko‘zga tashlanishi lozim. Shuningdek, Jeydon Sancho va Jovanni Reynalar ijrosida ham shou tomosha qilsak, ajab emas.

«RB Leypig» – Dayot Upamekano

Dayot ayni damda sayyoramizdagi barcha grand klublar e’tibor markazida turibdi. Shunday bo‘lsada, Nagelsman uni yana bir mavsum tarkibda ushlab qolishga muvaffaq bo‘ldi. E’tiborlisi shundaki, Upamekano jamoaning o‘yin falsafasida juda muhim rol ijro etadi. Birinchi pasdan tortib, o‘yin tempigacha markaziy himoyachi javobgar. Boshqacharoq qilib aytganda, u zamonaviy himoyachilar avlodidan. Katta ehtimol bilan, yaqin 10 yil ichida Dayot dunyoning eng kuchli markaziy himoyachisi nomini hech kimga bermaydi. Bu mavsum oldindagi mavsumlar debochasi bo‘lib xizmat qilishi mumkin.

«Bayer» – Patrik Shik

Kay Havers ketgach, Amiri va Virtslar yetakchilikni o‘z qo‘liga olishi lozim. Markaziy hujumda esa, Patrik Shik harakat qiladi. «Roma»dan 26,6 million yevro evaziga xarid qilingan forvard o‘tgan mavsumni «RB Leypsig» safida ijara asosida o‘tkazdi. Yangi mavsumda esa, u boshqa bir nemis klubida to‘p suradi. O‘z iqtidorini to‘liq namoyish eta olmagan futbolchiga «Bayer» qay darajada yordam bera oladi? Bundesliganing ushbu mavsumida savolning javobini bilib olishimiz mumkin.

«Borussiya M» – Markus Tyuram

Tan olish lozim, ushbu klub hujum chizig‘ida ajoyib uchlik shakllanib bormoqda. Alassan Plea, Brel Embolo va Markus Tyuram! Afsonaviy Liliyan Tyuramning o‘g‘li otasidan farqli o‘laroq, hujumda harakat qilishni afzal ko‘rdi. 23 yoshli futbolchi o‘tgan mavsumda barchaning e’tiboriga (10 ta gol, 8 ta assist) tushgan edi. Yangi mavsum aynan u «Borussiya M»ning yangi yetakchisi bo‘lishi kutilmoqda.

«Verder» – Taxit Chong

Bremen klubi «mo‘’jiza» evaziga Bundesligadagi o‘rnini saqlab qolgach, yangi mavsumni yaxshiroq o‘tkazish haqida bosh qotirishni boshlab yubordi. To‘g‘ri, bugungi kunda jamoa yetakchiligiga Milot Rashis asosiy da’vogar, biroq «Manchester Yunayted»dan ijaraga olingan Taxitni ham unutmaslik lozim. Yosh bo‘lishiga qaramay, Chong allaqachon kubok uchrashuvida gol kiritishga muvaffaq bo‘ldi. O‘zining ilk to‘liq mavsumini o‘tkazish arafasidagi Chongning o‘yinlaridan bebahra qolmang! «Qizil iblislar» muxlislari bu futbolchini alohida kuzatib borishlarini tavsiya etamiz!

«Shalke» – Ozan Kabak

Ozan mart oyida 20 yoshni qarshi oldi. Turk allaqachon grand klublar shortlistidan o‘rin egalladi. E’tiborlisi shundaki, u o‘yindan o‘yinga o‘sib bormoqda. Sovuqqon yarim himoyachi universallik sari intilmoqda. Agar bu mavsumni ham ko‘tarinki kayfiyatda o‘tkaza olsa, katta ehtimol bilan kelasi mavsumni grand jamoalardan birida boshlashi aniq. Shuningdek, «Shalke» tarkibida yosh uelslik futbolchi Rabbi Motondo ham e’tiborga molik! Uni ham kuzatib borishni unutmang.

“Arminiya” – Ritsu Doan

22 yoshli yapon futbolchisi “Arminiya”ni elitada jon saqlab qolishi uchun jon kuydirishiga to‘g‘ri keladi. To‘g‘ri, qit’adoshimiz PSV klubida o‘z o‘rnini topa olmadi,biroq endi unda faoliyatini qayta ishga tushirish uchun ikkinchi imkon mavjud. «Groningen» klubida namoyish etgan tempni Bundesligada takrorlay olsa, ko‘p o‘tmay biz Doanning nimalarga qodir ekanligini bilib olamiz.

«Union» – Maks Kruze

«Nemis Zlatani» laqabi bilan mashhur bo‘lgan Kruze o‘z vataniga qaytib keldi. «Fenerbahche»dagi o‘rtacha mavsumlardan so‘ng, «Union» uni o‘z tarkibiga qo‘shib katta tavakkalga qo‘l urdi. Gap shundaki, janjallar uyasi sanalgan Maks juda katta maosh oladi. Hozircha, bu maoshni oqlashi yoki oqlay olmasligi katta so‘roq ostida qolmoqda. O‘z iqtidorining 10 foizini ham namoyish eta olmagan Kruzega va «Union» klubiga yangi mavsumda omad tilab qolamiz.