Osiyo chempionlar ligasining G‘arb mintaqasi jamoalari ishtirokida markazlashgan holda o‘tkazilayotgan musobaqada "Paxtakor" to‘rtinchi o‘yinga kelib nihoyat g‘alaba qozonishga muvaffaq bo‘ldi.

Eronning "Shahr Xodro" klubiga qarshi o‘yinda tomonlar ko‘plab xavfli vaziyatlarni yaratishdi. Ammo uchrashuvda faqat bitta gol urildi. Ikkinchi bo‘limning 65-daqiqasida Javohir Siddiqov tomonidan burchakdan yetkazilgan uzatmani Masharipov bosh bilan raqib darvozasiga joylab qo‘ydi.

Uchrashuv boshlanish arafasida "Al-Hilol" musobaqadan chetlatilgani aniq bo‘lgani uchun "Paxtakor" eronliklarga qarshi o‘yin natijasidan qat’iy nazar guruhda 1-o‘rinni egallab bo‘lgan edi. Shuning uchun "sherlar" murabbiylar shtabi ikkinchi bo‘limda asosiy tarkibning 5 nafar o‘yinchisiga dam berishga qaror qilib, maydonga yangi kuchlarni tashladi.

"Paxtakor" bugungi g‘alabadan so‘ng guruh bosqichini 10 ochko bilan yakunladi. Toshkentliklar nimchorak finalni 26 sentyabr kuni Eronning "Istiqlol" klubiga qarshi o‘tkazadi.

OCHL, 6-tur
"Shahr Hodro" - "Paxtakor" - 0:1
Gol: Jaloliddin Masharipov (65)
"Shahr Hodro": Matin Safaian, Ali Ne’mati, Farshad Faraji, Omid Mansuri, Hassan Ja’fari, Muhammad Faramarzi, Akbar Sodiqi, Ali Taheran, Muhammad Rizo Xalatbari, Ruholloh Sayfulloh, Muhammad Najafabadi.
"Paxtakor": Suyunov, Alijonov (Komilov 46), Anzur Ismoilov, Krimes (Abdullayev 67), Sayfiyev, Hamrobekov (Kozak 46), Abror Ismoilov, Hamdamov (Sidiqov 46), Cheran (Sobirjonov 77), Masharipov, Sergeev.