Ushbu ruknimizdagi eng so‘nggi yangiliklar bilan tanishtirishda davom etamiz.
Eriksen APLga qaytadi?!
Milanning «Inter» klubi yarim himoyachisi Kristian Eriksen faoliyatini APLda davom ettirishi mumkin.
"Taem Talk« nashrining ma’lum qilishicha, »qizil iblislar« Eriksenni qo‘lga kiritish uchun "Inter"ga 18 million yevro taklif etmoqda.
Manbaning ma’lum qilishicha, Sulsher ushbu transferni bir hafta ichida rasmiylashtirishni istamoqda.
Kyuizans ham APLga yo‘l olmoqda
Myunhenning «Bavariya» jamoasi yarim himoyachisi Mikael Kyuizans yangi mavsumni «tumanli albion»da boshlashi mumkin.
"Footmercato« nashrining ma’lum qilishicha, 21 yoshli futbolchining xizmatlari bilan "Lids" jiddiy qiziqib qolgan.
Manbaning ma’lum qilishicha, Myunhen klubi o‘z futbolchisini ijaraga berishga rozi. Jamoa fransuzning o‘yin amaliyotiga ega bo‘lishi uchun hamma narsaga tayyor.
Fofana trendda!
«Sent-Etyen» jamoasi himoyachisi Uesli Fofana faoliyatini ingliz klublaridan birida davom ettirishga yaqin.
Jurnalist Nikola Skira bergan ma’lumotlarga qaraganda, 19 yoshli futbolchi bilan «Lester» va «Vest Hem» jamoalari jiddiy qiziqib qolgan.
Manbaning ma’lum qilishicha, fransuz klubi himoyachini 40 million yevrodan kamiga qo‘yib yubormoqchi emas.
«Marsel» «yulduzcha»ni qo‘lga kiritdi
Braziliyalik yarim himoyachi Luis Enrike Lima «Marsel» jamoasi bilan shartnoma imzoladi.
«Botafogo» klubidagi o‘yinlari bilan grand klublar e’tiborini tortgan bo‘lajak yulduz yangi mavsumni «Marsel» safida boshlaydi.
Klub rasmiy saytining ma’lum qilishicha, klub Lima bilan 5 yillik shartnoma imzolagan. Ayni damda, transferning moliyaviy jihatlari haqida ma’lumot yo‘q.
«Roma» «Real» bilan aloqaga chiqdi
Rimning «Roma» klubi transfer huquqi «Real Madrid»ga tegishli bo‘lgan Borxa Mayoral bilan qiziqib qoldi.
Jurnalist Janluka Di Marsio bergan ma’lumotlarga qaraganda, «bo‘rilar» hujumchi borasida Madrid klubi bilan muzokaralar olib bormoqda.
Eslatib o‘tamiz, Mayoralning «Real» bilan tuzgan shartnomasi 2021 yilda o‘z yakuniga yetadi. Uning transferi 10-12 million yevroga baholanmoqda.
