Madridning «Real» klubi markaziy himoyachisi Antonio Ryudiger yozgi transfer oynasida jamoani tark etish imkoniyatlarini ko‘rib chiqmoqda. Bu haqda Ispaniyaning Cadena SER nashri xabar berdi.

Ma’lumotlarga ko‘ra, 33 yoshli germaniyalik himoyachi «qirollik klubi»ning shartnomani uzaytirish borasidagi taklifiga hali javob bermagan. Buning asosiy sababi sifatida futbolchiga boshqa bir noma’lum klubdan moliyaviy jihatdan juda manfaatli taklif tushgani aytilmoqda. Hozirda tajribali himoyachi faoliyatini boshqa jamoada davom ettirish variantini jiddiy o‘ylab ko‘rmoqda, biroq yakuniy qaror hali qabul qilinmagan.

Ryudigerning «Real» bilan amaldagi kelishuvi shu yilning iyun oyi oxirida o‘z nihoyasiga yetadi. Joriy mavsumda himoyachi barcha musobaqalarda 23 ta o‘yinda ishtirok etib, o‘z hisobiga bitta gol yozdirib qo‘ygan.