Transfer olamidagi yangiliklar

Ushbu ruknimizdagi eng so‘nggi yangiliklar bilan tanishtirishda davom etamiz.

Tellas APLda?!

Portugaliyaning “Portu” klubi himoyachisi Aleks Tellas bir sutka ichida “qizil iblislar” safiga kelib qo‘shilishi mumkin.

“Daily Telegraph” nashrining ma’lum qilishicha, ingliz klubi yakshanba kuni futbolchining transferi borasida rasmiy kelishuvga erishishi mumkin.

Manbaning ma’lum qilishicha, ushbu transfer 20 million yevroga baholanmoqda.

Milik ketadimi?

Italiyaning “Napoli” klubi hujumchisi Arkadiush Milik faoliyatini boshqa klubda davom ettirishga yaqin.

Futbolchi bilan “Roma” jiddiy qiziqib qolgan edi, biroq transfer barbod bo‘ldi.

“Tuttosport” nashrining ma’lum qilishicha, bu vaziyatdan “Fiorentina” foydalanmoqchi. “Binafshalar” Milikni sotib olish sharti bilan bir mavsumga ijaraga olish borasida “Napoli”ga taklif bilan chiqqan.

Ayni damda, klublar o‘rtasida muzokaralar davom etmoqda.

Uolkot nishonda

Angliyaning “Everton” klubi vingeri Teo Uolkot faoliyatini APLning boshqa bir klubida davom ettirishi mumkin.

“TaemTalk” nashrining ma’lum qilishicha, 31 yoshli futbolchi bilan “Vest Hem” va “Kristal Pelas” klublari shartnoma imzolash niyatida.

Manbaning ma’lum qilishicha, Karlo Anchelotti Teoni klubda olib qolmoqchi emas.

Ruganni “Renn”da!

Turinning “Yuventus” jamoasi himoyachisi Daniyel Rugani avval xabar berganimizdek faoliyatini “Renn” jamoasida davom ettiradigan bo‘ldi.

Bugun futbolchi Fransiyaga uchib keldi. Ma’lumotlarga qaraganda, himoyachi ertaga klub bazasida tibbiy ko‘rikdan o‘tadi.

Eslatib o‘tamiz, himoyachini “Renn” bir mavsumga 1,5 million yevro evaziga ijaraga oldi.

Ryudiger Milanda?!

Londonning “Chelsi” klubi himoyachisi Antonio Ryudiger faoliyatini “A seriya”da davom ettirishga yaqin turibdi.

“Calciomercato” nashrining ma’lum qilishicha, “rossonerilar” nemis futbolchisi bilan allaqachon shaxsiy shartnoma borasida muzokaralar olib bormoqda.

Manbaning ma’lum qilishicha, “Milan” Ryudigerni bir mavsumga ijaraga olishni reja qilmoqda.