"Liverpul" bosh murabbiyi Yurgen Klopp Angliya chempionati taqvimini tanqid ostiga oldi. Taqvimga ko‘ra, mersisaydliklar 25 noyabr kuni tunda "Atalanta"ga qarshi maydonga chiqishsa, jamoa 28 noyabr kuni tush paytida APL doirasida "Brayton"ga qarshi safarda o‘ynaydi. Ya’ni ikki o‘yin orasidagi vaqt 3 sutkadan kamroq.

"Barcha menga taqvim tuzish qiyin ekanini aytadi. Ammo eng ko‘p qiyinchilikka duch keladiganlar — o‘yinchilar. Qolganlar esa ofisda o‘tirib shunchaki qaror qabul qiladi. Agar biz chorshanba kuni maydonga tushib, keyingi bahsni shanba kuni kunduzi o‘tkazadigan bo‘lsak, ishonchim komilki, mavsum oxirida safimizdagi sog‘lom futbolchilar soni 11 nafardan kam bo‘ladi.

Ha, bizda 5 o‘yinchini almashtirish imkoniyati mavjud, ammo biz ularning barchasidan foydalana olmaymiz. Kimdir 89-daqiqada jarohat olishi mumkinligini doimo inobatga olish kerak. Futbolchi almashtirishni erta amalga oshira olmayman, aks holda, kimdir jarohat olsa, o‘yinni 9 kishi bo‘lib yakunlashimizga to‘g‘ri keladi", - dedi Klopp.