Ushbu ruknimizdagi eng so‘nggi yangiliklar bilan tanishtirib o‘tishda davom etamiz.
Alenya ketadi
Kataloniyaning «Barselona» jamoasi yarim himoyachisi Karlos Alenya faoliyatini «La Liga»ning boshqa jamoasida davom ettirishga juda yaqin turibdi.
22 yoshli futbolchi Ronald Kumanning rejalaridan o‘rin egallamagach, o‘yin amaliyotisiz qolib ketmaslik uchun «Real Betis» bilan shartnoma imzolasha qaror qildi.
AS nashrining ma’lum qilishicha, hatto futbolchi Pellegrini bilan telefon orqali suhbat qurgan va «Betis»ga o‘tish borasida fikr almashgan.
Iskoning bozori chaqqon
Madridning «Real» jamoasi yarim himoyachisi Isko Alarkon faoliyatini boshqa jamoada davom ettirishi tobora aniqlashib bormoqda.
AS nashrining ma’lum qilishicha, endilikda ispaniyalik yarim himoyachining xizmatlari bilan «Sevilya» ham jiddiy qiziqib qolgan. Futbolchining ageti hali-hamon mijozining kelajagi borasida ma’lumot berganicha yo‘q.
Eslatib o‘tamiz, avvalroq yarim himoyachi bilan «MYU» va «Siti» klublari qiziqish bildirgan edi.
Kubo ketadimi?
Transfer huquqi «Real Madrid»ga tegishli bo‘lgan Takefuso Kubo qishda o‘z jamoasini o‘zgartirishi mumkin.
Ayni damda «Vilyareal» sharafini himoya qilayotgan futbolchi yetarli o‘yin amaliyotiga ega bo‘lmayapti. Shu bois, «qirollik klubi» uni boshqa bir ispan klubiga ijara asosida yuborish haqida bosh qotirmoqda.
Ispan nashrlarining ma’lum qilishicha, bu klub katta ehtimol bilan «Betis» bo‘ladi.
Dibala trendda!
Turinning «Yuventus» jamoasi hujumchi Paolo Dibala faoliyatini boshqa chempionatda davom ettirishi mumkin.
“Taem Talk” nashrining ma’lum qilishicha, 27 yoshli futbolchi bilan «Manchester Yunayted» va «Real» jamoalari shartnoma imzolash ilinjida.
Manbaning ma’lum qilishicha, Turin klubi futbolchi istagan maoshni berishga qodir emas. Shu bois, Dibala yangi shartnoma imzolash borasida shoshilmayapti.
U qaytadi!
«Yuventus», «Bavariya» va “Atletiko” singari jamoalarda to‘p surgan hujumchi – Mario Manjukich faoliyatini APLda davom ettirishi mumkin.
Futbolchining agenti – Ivan Chetkovichning ma’lum qilishicha, mijozi ayni damda o‘zini juda yaxshi his etmoqda va yangi chaqiruvlarni qabul qilishga tayyor.
So‘nggi ma’lumotlarga qaraganda, Manjukichning «Barselona» bilan muzokaralar olib borayotgani haqida barcha xabarlar mish-mish.
