O‘zbekiston kubogi 1/4 final doirasidagi “Mash’al” - “Qo‘qon-1912” uchrashuvidan keyingi matbuot anjumanining birinchi qismida mehmonlar ustozi Baxtiyor Ashurmatov ishtirok etdi.
- Gapni ochig‘i, yigitlarning matonatiga, o‘zlarida kuch topa olayotganlariga qoyil qolyapman. Ularga minnadorchilik bildiraman, ta’zimdaman. Bugun mag‘lubiyatga uchrasak, jamoamizdagi yo‘qotishlar haqida gapirishim mumkin edi. Sakkiz nafar futbolchimiz safdan chiqqan. Zaxirada 4 nafar futbolchi qoldi. Futbolchilarimizni Qo‘qonning qahramonlari degan bo‘lardim. Shunday bo‘lsa-da, bugun g‘alaba qozondik va yarim finalga yo‘llanma oldik. Bu yog‘i ikki qadam qoldi. O‘ylaymanki kubok o‘yinlarining qolgan qismida ham munosib qatnashamiz.
O‘yin haqida gapiradigan bo‘lsak, birinchi bo‘limda yaxshi o‘yin namoyish etdik. Ikkinchi golni kiritishimiz ham mumkin edi. Ikkinchi bo‘limda esa mezbonlar ham yaxshi to‘p surishdi. So‘nggi daqiqada Muzaffar Abdullayevning seyvi bizga g‘alaba keltirdi. “Mash’al” so‘nggi daqiqalarda pley-offga amal qilgani uchun rahmat aytaman.
Bugun juda ham munosib jamoa ustidan g‘alaba qozondik va bu g‘alaba bilan Qo‘qonlik futbol muxlislari, jamoamiz rahbariyatini tabriklaymiz. Har bir jamoa muxlisi o‘z jamoasining g‘alaba qozonishini istaydi. Bugun muboraklik ishqibozlar ham g‘alabani kutishgandi. Quvondiq Ro‘ziyev jarohati bilan maydonga tushmoqda.
Mavsum so‘nggiga kelib tarkibimizda yo‘qotishlarga duch keldik. Buning ustiga mavsum ham uzoq davom etdi. Shuning uchun yetakchi futbolchilarimizning jarohatlari borligiga qaramay, ularni maydonga tushiryapmiz. Endi yarim finalga munosib tayerlanishimiz kerak.