Osiyo boks konfederasiyasi prezidenti Anas Alotayba tashkilotda rasman yangi Fond - Osiyoda boksni rivojlantirishni qo‘llab-quvvatlash jamg‘armasi tashkil etilganini ma’lum qildi. E’tiborlisi, ushbu fondga aynan o‘zbekistonlik mutaxassis rahbarlik qiladigan bo‘ldi. Unga ko‘ra, O‘zbekiston Milliy olimpiya qo‘mitasi raisi o‘rinbosari, O‘zbekiston boks federasiyasi raisining birinchi o‘rinbosari Saken Polatov ushbu fond rahbari etib tayinlandi.

ASBC (Osiyo boks konfederasiyasi)  rahbari ushbu tashkilot tuzilganini e’lon qilar ekan, Osiyoda boksni yanada rivojlantirish borasida uzoq muddatlik strategiya ishlab chiqilganini aytdi.

Kelasi yili ASBC byudjetida yangi Fond uchun ma’lum miqdordagi mablag‘ ajratiladi. Ushbu pul qit’amizda boksi rivojlanayotgan mamlakatlar milliy federasiyalariga ajratiladi.

Osiyo boks konfederasiyasi Fond so‘roviga asosan, bunday mamlakatlarni boks uchun zarur bo‘lgan anjomlar, ta’lim kurslari, logistika masalalari va boshqa yo‘nalishlar bo‘yicha qo‘llab-quvvatlaydi.

Fond komissiyasi tarkibida hamyurtimizga besh nafar mintaqaviy vise-prezident ham tayinlangan. Unga ko‘ra, fond rahbariyati tarkibi quyidagicha ko‘rinish olgan:

Saken Polatov (O‘zbekiston) - Osiyo boks konfederasiyasi Ijroqo‘m a’zosi, Fond raisi.

Edgar Pikson (Filippin) - Osiyo boks konfederasiyasi Ijroqo‘m a’zosi, Fond raisi o‘rinbosari

Favzi Asafra (Falastin) - Falastin boks federasiyasi prezidenti

Raj Kumar Sacheti (Hindiston) - Hindiston boks federasiyasi ijrochi direktori, ASBC prezidenti maslahatchisi

Billi Vong (Makao) - Makao boks federasiyasi vakili

Hamyurtimiz o‘z bilim va malakasi evaziga endilikda nafaqat O‘zbekiston, balki qit’amiz boksi rivojiga ham o‘z hissasini qo‘shadigan bo‘ldi. Fursatdan foydalanib, Saken Jetibayevichga yangi mas’uliyatli lavozimda muvaffaqiyatlar, omadlar tilaymiz.

O‘zbekiston boks federasiyasi matbuot xizmati