“Navbahor”ning Coca Cola Superliga – 2020 dagi statistik ma’lumotlari bilan tanishtirishda davom etamiz.

Bu safar penaltilar borasidagi statistikaga to‘xtalishni lozim deb topdik.

Yakunlangan mavsumda jamoamiz raqiblari darvozasiga hakamlar tomonidan 4 ta 11 metrli jarima zarbasi belgilandi. Mazkur penaltidan ikkitasini jamoamiz sardori va shtatli penaltichisi Azimjon Ahmedov aniq amalga oshirgan (2-tur, “Lokomotiv”,2:0, 9-tur, “Qizilqum”, 1:0) hamda o‘sha o‘yinlarda “lochinlar” zafar quchishgandi.

Yana ikkita 11 metrli jarima zarbasi esa noaniq bajarildi.

Jamoamizning mahoratli yarim himoyachisi Azizbek Turg‘unboyev (4-tur,“Nasaf”, 2:2) va Azimjon Ahmedov (23-tur, “Surxon”, 1:0) ning penaltilarini raqib darvozabonlari bartaraf etishgandi.

Shunday bo‘lsa-da, bu jamoamiz natijasiga unchalik ham salbiy ta’sir ko‘rsatmagan, o‘sha bahslardan birida durang qayd etilgan bo‘lsa, ikkinchisida “lochinlar” g‘alaba qozonishgandi.

E’tiborlisi, hakamlar yakunlangan mavsumda “Navbahor” darvozasiga  ham 4ta 11 metrli jarima zarbasi belgilashgan hamda ularning 3 tasi aniq amalga oshirilgan (Stanislav Andreev, “Metallurg”, Murod Xolmuhammedov, “Qo‘qon - 1912” va Xurshid G‘iyosov, “Bunyodkor”).

Bitta penaltini esa jamoamiz darvozaboni O‘tkir Yusupov bartaraf etgan (Umarbek Eshmurodov, “Nasaf”).

“Lochinlar” darvozasiga 11 metrli jarima zarbasi belgilangan o‘yinlarning 2 tasida “Navbahor” g‘alaba qozongan bo‘lsa (6-tur, “Meatllurg”, 3:1, 21-tur, “Bunyodkor”, 2:1),  1 ta bahsda durangga erishgan (4-tur, “Nasaf”, 2:2) hamda yana bitta bahsda imkoniyatni boy bergan (13-tur, “Qo‘qon-1912”, 0:1).

Yana shuni ham ta’kidlash joizki, qo‘qonliklar bilan Toshkentda kechgan o‘yinning qo‘shimcha daqiqasida jamoamiz darvozasiga penalti belgilangan va Murod Xolmuhammedovning aynan 11 metrli jarima zarbasidan urgan goli “Qo‘qon-1912”ga g‘alaba keltirgandi.

“Navbahor” PFK matbuot xizmati.