“Навбаҳор”нинг Coca Cola Суперлига – 2020 даги статистик маълумотлари билан таништиришда давом этамиз.

Бу сафар пенальтилар борасидаги статистикага тўхталишни лозим деб топдик.

Якунланган мавсумда жамоамиз рақиблари дарвозасига ҳакамлар томонидан 4 та 11 метрли жарима зарбаси белгиланди. Мазкур пенальтидан иккитасини жамоамиз сардори ва штатли пенальтичиси Азимжон Аҳмедов аниқ амалга оширган (2-тур, “Локомотив”,2:0, 9-тур, “Қизилқум”, 1:0) ҳамда ўша ўйинларда “лочинлар” зафар қучишганди.

Яна иккита 11 метрли жарима зарбаси эса ноаниқ бажарилди.

Жамоамизнинг маҳоратли ярим ҳимоячиси Азизбек Турғунбоев (4-тур,“Насаф”, 2:2) ва Азимжон Аҳмедов (23-тур, “Сурхон”, 1:0) нинг пенальтиларини рақиб дарвозабонлари бартараф этишганди.

Шундай бўлса-да, бу жамоамиз натижасига унчалик ҳам салбий таъсир кўрсатмаган, ўша баҳслардан бирида дуранг қайд этилган бўлса, иккинчисида “лочинлар” ғалаба қозонишганди.

Эътиборлиси, ҳакамлар якунланган мавсумда “Навбаҳор” дарвозасига  ҳам 4та 11 метрли жарима зарбаси белгилашган ҳамда уларнинг 3 таси аниқ амалга оширилган (Станислав Андреев, “Металлург”, Мурод Холмуҳаммедов, “Қўқон - 1912” ва Хуршид Ғиёсов, “Бунёдкор”).

Битта пенальтини эса жамоамиз дарвозабони Ўткир Юсупов бартараф этган (Умарбек Эшмуродов, “Насаф”).

“Лочинлар” дарвозасига 11 метрли жарима зарбаси белгиланган ўйинларнинг 2 тасида “Навбаҳор” ғалаба қозонган бўлса (6-тур, “Меатллург”, 3:1, 21-тур, “Бунёдкор”, 2:1),  1 та баҳсда дурангга эришган (4-тур, “Насаф”, 2:2) ҳамда яна битта баҳсда имкониятни бой берган (13-тур, “Қўқон-1912”, 0:1).

Яна шуни ҳам таъкидлаш жоизки, қўқонликлар билан Тошкентда кечган ўйиннинг қўшимча дақиқасида жамоамиз дарвозасига пенальти белгиланган ва Мурод Холмуҳаммедовнинг айнан 11 метрли жарима зарбасидан урган голи “Қўқон-1912”га ғалаба келтирганди.

“Навбаҳор” ПФК матбуот хизмати.