Yaqinda xizmat safari bilan Nukusda bo‘ldik. Ikki holat e’tiborimni tortdi.

Birinchisi mehmonxonada yuz berdi. Resepshnda yosh yigit bizga xonalarimiz kalitlarini berdi, pasportlarimizdan nusxa oldi. Ikkinchi qavatga ko‘tarilayotganimizda "Aral samali" bosh murabbiyi Temur Turdiyev yigitni tanishtirdi: yetakchi futbolchilarimizdan biri, bugun asosiyda maydonga tushadi...

Keyinroq mashinada stadion tomon ketayotganimizda, bo‘m-bo‘sh ko‘chada uzoqdan velosiped uchib kelayotgan yigit ko‘rindi. Murabbiy bu yigitni ham tanishtirdi: klub sardori, haliroq ishlarini tugatib, o‘yin uchun yetib keladi...

Nukusda futbol bor edi. Mana shunday yigitlar va futbolni sevuvchi ikki-uch kishi "Aral samali" nomi bilan Birinchi ligada ishtirok etib kelishdi. Ular mavsum davomida maosh olishmagan, faqatgina xizmat safarlari uchun pul topib berishgan. Mashinada Nukusdan vodiyga borishga to‘g‘ri kelsa, tasavvur qilaverasiz. Ammo yuqoridagi yigitlar yillar davomida nolimay, to‘p tepishdi. Mana shunday futbolchilar uchun ham "Aral"ga futbolni qaytarsa arziydi.

Keyinroq Qoraqalpog‘iston Vazirlar Kengashi raisi Qahramon aka Sariyev bilan bog‘landik. Bu kishi bizga futbolchilar haqi albatta to‘lab berilishini aytdi. Agar rejalar biz o‘ylagandek yo‘nalishda ketsa, 2021 yil Qoraqalpog‘iston futbolida yaxshi o‘zgarishlar bo‘lishi kerak.

Diyor Imomxo‘jayev.