Ispaniyaning "El Mundo" nashri "Barselona" va Lionel Messi o‘rtasida 2017 yilda tuzilgan shartnomaning nusxasini qo‘lga kiritdi va uning detallarini e’lon qildi.
Manbaga ko‘ra, mazkur kelishuv sport tarixidagi eng yirik shartnoma hisoblanadi. Ushbu shartnomaga ko‘ra, argentinalik futbolchi 4 yil davomida umumiy miqdorda 555 237 619 yevro olishi ko‘zda tutilgan. Shartnoma yakunlanishiga 5 oy vaqt qolganida u 511 540 545 yevro pulni olib bo‘ldi.
«Barselona» Messiga har yili mukofotlarni ham qo‘shib hisoblaganda 138 mln yevro to‘lash majburiyatini o‘z zimmasiga olgan. Shuningdek, kelishuvda shartnoma imzo chekkani uchun bir marta to‘lanadigan 115 225 000 yevro va klubga sadoqati uchun 77 929 955 yevro mukofot berilishi nazarda tutilgan.
Eslatib o‘tamiz, Messi hali «Barselona» bilan shartnomani uzaytirmadi. Klubga yangi prezident saylanganidan so‘ng u bir qarorga keladi.
