Namanganda 26 mart kuni bo‘lib o‘tgan O‘zbekiston - Gana (2:1) terma jamoalari o‘rtasidagi uchrashuvdan keyingi matbuot anjumanining ikkinchi qismida milliy terma jamoamiz bosh murabbiyi Vadim Abramov OAV xodimlarining savollariga javob berdi.

Terma jamoamiz ustozi avvalo o‘yin haqida o‘z fikrlarini bildirib, jumladan, shunday dedi:

— Uchrashuv haqida nima deyish mumkin? Birinchi navbatda muxlislarga minnatdorchilik bildiraman. Bunday ajoyib muhitda to‘p tepish doim yoqimli. O‘yin ularga manzur kelgan bo‘lsa, biz bundan xursandmiz. Gana termasining yaxshi jamoa ekanligini ko‘rdingiz. G‘alaba qozonish va muxlislar ishonchini oqlash yaxshi.

— Bugun markaziy himoyada o‘ynagan namanganlik Azimjon Ahmedovning o‘yinini qanday baholaysiz?
— Uning ko‘rsatgan o‘yinini yomon deya olmayman. Bu chiziqda muammolar borligi sababli, unga imkoniyat berib ko‘rdik. Umid qilamanki, hammasi ko‘ngildagidek bo‘ladi. Biz barchaga imkoniyat beramiz. O‘zbekiston pasportiga ega barcha futbolchilar terma jamoaga nomzod. Superligada endigina uchta tur o‘tdi. Keyingi o‘yinlarni yana kuzatamiz. Namanganlik futbolchilar kuchliligini ko‘rsatsa, yaxshi darajada o‘ynashsa, terma jamoadan chaqiruv olishadi.

— Terma jamoamiz ko‘plab hujumlar uyushtirganiga qaramay, ularni yakuniga yetkaza olmadi. Umuman olganda, vaziyatlardan foydalanishda muammolar bor. Ushbu holatga izoh bera olasizmi? Shuningdek, bugungi o‘yinda Eldor Shomurodovdan ko‘p narsa kutilgandi...
— Xorijda o‘ynayotgan legionerlar uzoq parvozlarni amalga oshirib yetib kelishdi. Uch kun ichida tiklanishdi va moslashishdi. Hamma futbolchilar har xil holatda edi. Eldor Shomurodovni vaqtliroq zaxiraga olishni rejalashtirgandim. To‘g‘ri, u vaziyatlardan foydalana olmadi. Keyingi uchrashuvda uning holati yanada yaxshiroq bo‘ladi, deb o‘ylayman.

— Raqib jismoniy jihatdan kuchli edi. Jarima zarbasidan gol urib, hisobni tenglashtirishdi. O‘sha vaziyatda darvozabon ham xatoga yo‘l qo‘ydi...
— Darvoza chizig‘i muammoli chiziqlardan biri hisoblanadi. Terma jamoaga nomzod darvozabonlarni ko‘zdan kechirishda davom etamiz. Maydondagi qolgan futbolchilar ham xatolarga yo‘l qo‘yishdi. Lekin ularni hech kim payqamadi. Darvozabonda doim mas’uliyat yuqori bo‘ladi. Ilyosov iqtidorli darvozabon.

Qaytaraman, darvoza chizig‘i og‘riqli nuqtamiz. Markaziy himoyachilarni yana ko‘ramiz. Shu nuqta ham muammoli hisoblanadi.

— Iroq terma jamoasi bilan bo‘ladigan o‘yinda qanday o‘zgarishlarga qo‘l urmoqchisiz?
— Hozir qaynoq kayfiyatda biror fikr bildirish qiyin. Ertaga barchasi aniq bo‘ladi. Kimdir jarohat olgan, yana kimdirda boshqa muammo bor. Namangan shahriga va muxlislarga yana bir bor rahmat aytaman.

“Navbahor” PFK matbuot xizmati.