Taniqli mutaxassis Alisher Nikimbayevning ma’lumot berishicha, JCH-2022|OK-2023 qo‘shma saralashi ikkinchi bosqichining markazlashtirilgan turniri taqvimini qulaylashtirish mumkin. Ya’ni OFK ma’lum shartlar asosida terma jamoalarga shunday huquq bergan...
***
- Xitoy va Yaponiya futbol assosiasiyalari milliy jamoa ma’muriyati qanday ishlashi kerakligini ko‘rsatib qo‘ydi. OFK barcha milliy federasiyalarga JCH-2022 saralash turlari o‘yinlari 3, 7, 11 va 15 iyun kunlariga rejalashtirilgan taqvim yubordi. Shuning barobarida barcha mamlakatlarga oxirgi turni 15 iyundan kechiktirmaslik sharti bilan o‘yinlar taqvimini o‘zgartirish imkoniyati berildi. Qarang, Xitoyda nima qilishdi? Mamlakat milliy jamoasi «A» guruhida yana 4ta o‘yin o‘tkazishi kerak. Ya’ni OFK taqdim etgan taqvimga ko‘ra, 11 kun ichida 4ta uchrashuv. Xitoyliklar shuni inobatga olib, Guam termasiga qarshi bahsni 7 iyundan 30 mayga ko‘chirish bo‘yicha muzokara boshlashdi. Qolaversa, Filippin termasi bilan uchrashuvni 11 iyundan 9 iyunga surish rejalashtirilmoqda. Shunday taqdirda Xitoy termasi nisbatan qulayroq taqvimga ega bo‘ladi:
30 may - Guam termasiga qarshi
3 iyun - Maldiv orollari termasiga qarshi
9 iyun - Filippin termasiga qarshi
15 iyun - Suriya termasiga qarshi
Oddiy aytganda, xitoyliklar ixtiyorida asosiy raqib - Suriya termasiga qarshi hal qiluvchi o‘yingacha 6 kun qoladi. Suriyaliklar esa OFK taqvimi bo‘yicha o‘ynashadi:
7 iyun - Maldiv orollari termasiga qarshi
11 iyun - Guam termasiga qarshi
15 iyun - Xitoy termasiga qarshi
O‘z maydonida o‘ynash ustunligi taqvim qulayligi bilan uyg‘un.
Xuddi shunga o‘xshash holat Yaponiyada ham bor. Yaponlar Myanma termasi bilan o‘yinni 3 iyundan 28 mayga ko‘chirishdi. «Samuraylar» Mo‘g‘uliston termasiga qarshi o‘yinni o‘tkazib bo‘lishdi va ularning taqvimi endi shunday ko‘rinishga ega:
28 may - Myanma termasiga qarshi
7 iyun - Tojikiston termasiga qarshi
15 iyun - Qirg‘iziston termasiga qarshi
Myanmaliklar ustidan qozoniladigan g‘alaba yaponlarga guruhda 1-o‘rin va uchinchi bosqichga muddatidan oldin chiqishni kafolatlaydi.
Xitoy tajribasi ibratli va u deylik, BAA yoki J.Koreya futbol assosiasiyalari tomonidan ham osongina qo‘llanilishi mumkin.
