Bu safar golga assistentlik. Belarus chempionatida o‘zini erkin his qilayotgan Shahboz Umarov (BATE) milliy liga 5-turida o‘z hisobiga samarali uzatma yozib qo‘ydi. E’tiborli tomoni, borisovliklar bu safar hamyurtimizning sobiq klubi - «Energetik-BGU»ni qabul qilib, 2:1 ko‘rinishida g‘alaba qozonishdi. 79-daqiqaga qadar maydonda faol harakatlangan Shahboz birinchi bo‘lim yarmida jamoasining ikkinchi goliga assistentlik qilib, g‘alabaga munosib ulush qo‘shdi. «Shaxtyor» hujumchisi Shahzod Ubaydullayev esa jamoasining «Slaviya»ga qarshi uy uchrashuvi (4:1) qaydnomasidan chetda qoldi.
Yana zaxiradan. «Jenoa» Italiya «A» seriyasi 31-turida «Milan» mehmoni bo‘lib, 1:2 hisobida yengildi. Genuya jamoasi hujumchisi Eldor Shomurodov bu safar ham o‘yinga zaxiradan qo‘shildi. Aniqrog‘i, hamyurtimiz 74-daqiqada Janluka Skamakka o‘rnini egalladi.
66 daqiqa harakat. Qozog‘iston Premyer-ligasi 5-turidan o‘rin olgan «Qiziljar» - «Aktobe» uchrashuvida mehmonlar 2:1 hisobida ustun kelishdi. G‘olib jamoa hujumchisi Igor Sergeev bu o‘yinda 66-daqiqagacha harakatlandi. «Aktobe» keyingi tur o‘yinini kecha o‘z maydonida «Shaxtyor» (Qaraganda)ga qarshi o‘tkazdi.
Rossiya va Ukrainada jimlik. Rossiyadagi legionerlarimiz - Oston O‘runov («Ufa»), Vitaliy Denisov («Tom»), Bobur Davlatov va Vagiz Galiulin («Nefteximik») jamoalarining oxirgi o‘yinida ko‘rinish berishmadi. Shuningdek, «Rux» vakili Bobur Abduxoliqov ham Ukraina chempionati 22-turida «Ingules»ga qarshi kechgan bahs (0:0) qaydnomasiga kiritildiyu, maydonga tushmadi.
«K»-ligada «sariq», xolos. Janubiy Koreya «K»-ligasi 10-turida hamyurtlarimizdan birgina Rustam Ashurmatov to‘liq 90 daqiqa o‘ynab, ikkinchi bo‘lim yarmida sariq kartochka oldi. Uning klubi «Kanvon» esa «Suvon Siti» safaridan mag‘lubiyat bilan qaytdi - 1:3. «Seongnam» yarim himoyachisi Jamshid Iskanderov esa «Chonbuk Motors» bilan o‘yin (0:1) qaydnomasiga kiritilmadi.
