Biz bugun qo‘shnilarimiz uchun xursandmiz. Dushanbening "Istiqlol" klubi Chempionlar ligasidagi debyut mavsumida ajoyib yurishni amalga oshiryapti.

Ochig‘i, bu unchalik ajablantirayotgani yo‘q. Chunki "Istiqlol" bunga bosqichma-bosqich yetib keldi. Ikki yil avval Toshkentda "Lokomotiv"ning yaxshi shakllangan tarkibini bejizga mag‘lub etmagandi, bekorga AGMK darvozasiga o‘sha kuni 3 ta gol urmadi va albatta OFK kubogida so‘nggi 5 yil ichida bekorga ikki marta finalda to‘p surmadi.

Chunki "Istiqlol" Tojikiston milliy termasi bazasi sifatida shakllantirilgan. Mamlakat prezidentining o‘g‘li, bugungi kunda Tojikiston FA prezidenti Rustami Emomali "Istiqlol"ni yangi bosqichga olib chiqdi deyish mumkin. Va bu 2002 yillardagi "Paxtakor"ni juda yodga solib yuboradi. Yodingizda bo‘lsa, "Paxtakor" ham Chempionlar ligasidagi ilk yurishida yarim finalga qadar yetib borgan, butun Osiyo uning o‘yinlari haqida bong urgan.

Ammo "Paxtakor"ning terma o‘zagi sifatida shakllantirilishi bizning futbolda olamshumul burilish yasamadi. Bitta yaxshi avlod yetishib chiqqanini aytmasa, biz na mundialga chiqdik va na Osiyoni zabt etdik. Qaytaga milliy chempionat uzoq yillar davomida chalajon ko‘rinishga keldi, "Paxtakor" raqobatdan holi jamoaga aylanib qoldi.

Tojikiston futboliga ham bu jihat xavf solishi mumkin. Biz bugun qo‘shnilar quvonchiga sherikmiz albatta. Va ularga biz yo‘l qo‘ygan xatolardan xulosa qilishlarini, iloji boricha ularni chetlab o‘tishga intilishlarini tilaymiz. Bugungi "Istiqlol"ning deyarli Tojikiston milliy termasi ekani mana shunday xulosamizga sabab. Hozircha esa ularga fantastik g‘alaba muborak bo‘lsin deymiz:

"ISTIQLOL" – AL-HILOL 4:1
Gollar: Manuchehr Jalilov (39, 44), Manuchehr Safarov (49, 53) — Gomis (24)