"Nasaf" OFK Kubogi “F” guruhi so‘ngi turida Turkmanistonning “Oltin Asr” jamoasi bilan kuch sinashadi. Bu bellashuv ikkala jamoa uchun ham muhim. Chunki “ajdarlar” guruhda 6 ochko jamg‘argan holda peshqadamlik qilayotgan bo‘lsa, ashxobodliklar 4 ochko jamg‘argan holda guruhda 2-o‘rinni egallagan.

 Jamoamiz guruhdan chiqishi uchun mazkur bellashuvda kamida durang qayd etishlari, raqibga esa g‘alaba kerak bo‘ladi. Lekin bu bellashuvda, Ro‘ziqul Berdiyev matbuot anjumanida aytib o‘tganidek, "ajdarlar" faqat g‘alaba uchun maydonga tushishadi.

“Nasaf” o‘z tarixida turkman jamoalariga 2001-2002 yilgi Osiyo Chempionlar Kubogida maydonga tushgan. Ushbu musobaqada “ajdarlar” qo‘shni Turkmanistonning “Kopetdog‘” jamoasi bilan kuch sinashgan uy-safar tizimida bo‘lgan har ikkala uchrashuvda ham vakillarimiz zafar quchishgan. Mehmonda bo‘lib o‘tgan birinchi bellashuvda jamoamiz 1:0 hisobda g‘alaba qozongan. Uchrashuvdagi yagona golga Shuhrat Toshpo‘latov mualliflik qilgan. Qarshidagi bahsda “ajdarlar” turkmanistonlik raqiblarini yirik 3:0 hisobida yengishgan. Uchrashuvdagi gollarga Bahrom Xaydarov, Shuhrat Mamajonov, Zafar Xolmurodov mualliflik qilishgan.
 
 “Oltin Asr” jamoasi haqida…

Raqibimiz Turkmaniston poytaxti Ashxobod sharafini himoya qiladi. Jamoa 2008 yilda tashkil topgan. Klub tashkil qilinganiga unchalik ko‘p vaqt bo‘lmagan bo‘lsa-da, ammo shu qisqa vaqt ichida jamoa Turkmanistonning sovrindor jamoalaridan biriga aylanib ulgurgan. Klub o‘z tarixida bir marotaba bronza, bir marta kumush, yetti karra mamlakat chempionligini, uch marotaba Turkmaniston kubogini va ikki marotaba Turkmaniston Superkubogini qo‘lga kiritgan. “Oltin Asr” 2018yilgi OFK Kubogida finalga qadar yetib borgan va Iroqning “Al-Quva” jamoasiga 0:2 hisobida imkoniyatni boy bergan.