"Насаф" ОФК Кубоги “F” гуруҳи сўнги турида Туркманистоннинг “Олтин Aср” жамоаси билан куч синашади. Бу беллашув иккала жамоа учун ҳам муҳим. Чунки “аждарлар” гуруҳда 6 очко жамғарган ҳолда пешқадамлик қилаётган бўлса, ашхободликлар 4 очко жамғарган ҳолда гуруҳда 2-ўринни эгаллаган.

 Жамоамиз гуруҳдан чиқиши учун мазкур беллашувда камида дуранг қайд этишлари, рақибга эса ғалаба керак бўлади. Лекин бу беллашувда, Рўзиқул Бердиев матбуот анжуманида айтиб ўтганидек, "аждарлар" фақат ғалаба учун майдонга тушишади.

“Насаф” ўз тарихида туркман жамоаларига 2001-2002 йилги Осиё Чемпионлар Кубогида майдонга тушган. Ушбу мусобақада “аждарлар” қўшни Туркманистоннинг “Копетдоғ” жамоаси билан куч синашган уй-сафар тизимида бўлган ҳар иккала учрашувда ҳам вакилларимиз зафар қучишган. Меҳмонда бўлиб ўтган биринчи беллашувда жамоамиз 1:0 ҳисобда ғалаба қозонган. Учрашувдаги ягона голга Шуҳрат Тошпўлатов муаллифлик қилган. Қаршидаги баҳсда “аждарлар” туркманистонлик рақибларини йирик 3:0 ҳисобида енгишган. Учрашувдаги голларга Баҳром Хайдаров, Шуҳрат Мамажонов, Зафар Холмуродов муаллифлик қилишган.
 
 “Олтин Aср” жамоаси ҳақида…

Рақибимиз Туркманистон пойтахти Aшхобод шарафини ҳимоя қилади. Жамоа 2008 йилда ташкил топган. Клуб ташкил қилинганига унчалик кўп вақт бўлмаган бўлса-да, аммо шу қисқа вақт ичида жамоа Туркманистоннинг совриндор жамоаларидан бирига айланиб улгурган. Клуб ўз тарихида бир маротаба бронза, бир марта кумуш, етти карра мамлакат чемпионлигини, уч маротаба Туркманистон кубогини ва икки маротаба Туркманистон Суперкубогини қўлга киритган. “Олтин Aср” 2018йилги ОФК Кубогида финалга қадар етиб борган ва Ироқнинг “Aл-Қува” жамоасига 0:2 ҳисобида имкониятни бой берган.